【長實疫苗抽獎】中咗李嘉誠頭獎500萬 有咩樓等住揀?
長實李嘉誠出招幫手谷針,一家便宜,三家著,如果中咗500萬元長江集團禮券,有咩新盤好吼?
下載Yahoo財經APP
美股、外匯、加密貨幣免費即時報價,自選投資組合獲取相關新聞提示。
長和系聯同李嘉誠基金會鐡定送出2,000萬元的禮券大抽奬,頭獎可獨吞500萬元長江集團禮券,用來買長實旗下新樓。
不過,長實近年推盤數量不多,而且部分更是豪宅為主,好似西半山「21 BORRETT ROAD」、沙田「名日.九肚山」等。連李寧老婆最近買咗BORRETT 近3000呎單位,要成2.328億元,呎價7.9萬元。呢啲天價樓唔易沾手,就算中咗獎,500萬銀連車位都唔夠買。
不用愁,長實地產業務廣泛,仲有親民的「住家盤」俾你揀,好似深水埗海壇街「愛海頌」,而家仲有貨尾單位賣緊,個盤實用面積由474至786方呎,間隔有2房和3房連套房及儲物室,最平賣緊三座19樓C室,面積474呎,賣1022萬元,如俾一半首期511萬元,貼多11萬就上到車,月供2萬元。
如果不喜歡九龍區,日出康城都有選擇,就係第8期「Sea to Sky」啦,項目有成1422伙,由2房至4房,而家仲有貨尾,數量唔多只有71個,最平要數第二座65樓D室,面積704呎,賣1633萬元,但入場價俾「愛海頌」貴,如果俾一半首期要抬多300多萬就可上車,月供3.2萬,除非同發展商借盡到8成5。
如果都嫌貴可能要等等,事關長實係洪水橋新盤「#LYOS」就快推,由於係新發展區,配套不多,估主打上車客,5球應該夠俾首期啦。
所以話超人出招,一可幫到政府,二可鼓勵市民打針,三又可以做番自己生意,邊個夠誠哥玩。