香港股市 已收市

【魚樂無窮】七國咁亂 眼看手勿動(唐牛)

用兩個字形容本周恒指的走勢,想必是反覆。周初係威係勢,一度彈近29000點,其後特朗普再打亂章,宣佈向中國2000億美元產品加徵10%關稅,當中還包括中國製造2025計劃的科技產品,拖累指數周三下試28000點,最新美國參議院又通過要求國會監督政府加徵關稅,說穿了就係唔想特朗普再亂嚟,帶動指數反彈……。

一星期發生咁多事,七國咁亂,然後指數埋單隨時無升跌,捉中的話有成千點進賬,但睇錯市就會再捱一刀,特朗普章法冇得捉,咁都贏到錢幸運成份極高,輸錢反而好正常,靜靜地佛系坐貨,無損無傷最舒服。所以我近排在不同媒體,都叫大家忍下手,火災現場尋寶,燒死冇命賠。

股市跌至低位,見到不少公司進行回購,原因只有兩個,第一係價殘抵買,第二係托價。當然,見底唔代表識升,橫行都可以悶死你,回購股博唔博得過,好大程度係睇回購對股價是否有刺激作用,本欄愛股之一領展(823),在回購盤推動下創新高,就係靚仔例子。真係好想入場幹一番嘅,不妨上披露易網頁做下功課啦。

唐牛fb專頁

http://www.fb.com/tongcow88