香港股市已收市

【魚樂無窮】也談港股爆煲(唐牛)

港股周三上衝三萬點,昨日在A股拖累下,強勢股如騰訊(700)、平保(2318)、港交所(388)齊齊掉頭,高位計齊齊唔見一大截,正所謂高處不勝寒,一有風吹草動,大家又會驚係咪散水,爆煲論隨即再次成為市場熱話。

兩位我非常欣賞嘅博士級資深市場人士——曾淵滄及林一鳴,昨日不約而同談及股市會否爆煲,前者指如果股市爆煲,樓市必定會跟隨,後者則斬釘截鐵指明年股市唔會爆煲,大家都偏向樂觀。

要股市爆煲,有兩個必要條件,第一,個煲要夠大,第二,有事情觸發個煲爆破。先談第一點,眾所周知,恒指雖然上到三萬點,但今年大部份時間都係慢牛式上升,仲要升嚟升去都係幾隻龍頭同埋北水股,至近期升勢才有蔓延及加速勢頭。種種迹象顯示,大部份散戶都係贏得雞碎咁多,甚至和和果果,貨源亦未由大贏家傳導至散戶手上,從呢個角度出發,煲依然未夠大。

第二點,觸發點。睇番近兩次7字頭股災,都係講緊世界級金融風暴,1997年在亞洲,2007年在歐美,中間亦經過一段時間醞釀,觀乎最新大局,加息縮表都推唔冧美股,阿爺同侵侵又friend過打band,橫睇掂睇都未見到風暴源頭,唯一一個估得到嘅可能性,就係北韓發難引發戰爭。機會有幾大?唔好浪費時間去推測啦!

有跟開我在其他平台推介的戰友,今年收穫應該都不俗,只要計好晒數,總倉位跌到某個水平即清倉走人,就肯肯定立在不敗之地,亦可以舒舒服服繼續享受呢個大升浪了。

唐牛fb專頁

www.fb.com/tongcow88