【魚樂無窮】加息又如何 高息股易升難跌(唐牛)
美國一如預期宣佈加息0.25厘,息口敏感股表現卻反高潮,受惠嘅銀行股如滙控(005)及恒生(011)高開低收,受累嘅地產股如新地(016)及新世界(017)卻逆市上升,無他,前者一早炒晒上去,後者則連番受壓,所以出現反常狀態。中線來說,銀行股受惠息差擴闊,同時間滙控有平保撐腰,恒生則處於無蟹貨區,絕對值得睇好。地產股係咪一定睇淡?今年地產股賣樓大豐收,嚟緊業績肯定靚到暈,加上負債水平低、資產折讓大,相信股價同樓價一樣,就算唔升都好難大跌了。
「加息周期展開,高息股可以睇淡啦。」回帶睇番過去兩年,美國加息共五次,合共上調1.25厘,吸引資金回流花旗國之餘,更順勢將本港拆息扯高,由於港人供樓按揭計劃大多以HIBOR掛鈎,所以供樓一族負擔明顯重咗;不過,你有冇發現,銀行存款利率從來冇跟加過?食息一族未能再靠紅簿仔搵食,高息股地位可謂絲毫無損。
還有一點要留意,股市炒作側埋一邊嘅情況,暫時似乎難以改變,高息股作為避險嘅角色更形重要,同一時間,樓市投資回報大減,有錢人只會繼續向高息股埋手,追求穩定回報,成為板塊另一股承托力,一句到尾,易升難跌也!