【魚樂無窮】向現實低頭掃貨(唐牛)
2018年第一次在yahoo財經同大家見面,先祝戰友們年頭贏到年尾。事實上,願望已經達成一半,事關恒指新一年已連升三日,計埋去年底更是八連升,加上大股細股雙翼齊飛,贏錢實屬理所當然,差別只在於金額多少吧。
除了升勢強勁外,上升範圍也明顯擴闊,石油股、內銀股、資源股升到啪啪聲,還有散戶至愛的港交所(388),再一次逼近高位。有跟開本欄嘅戰友都知道,唐牛鍾情嘅係騰訊(700)、平保(2318)、滙控(005)及領展(823),但為免被拋甩,昨日也要向現實低頭,買入內房股碧桂園(2007)及石油股中海油(883),以及大莊家港交所(388),希望可以趕到尾班車。
另一方面,新股市場亦非常熱鬧,單睇時間表已經有廿隻正在招股或準備上市,令人眼花瞭亂,你問我邊隻最值搏,我一定會揀希瑪眼科(3309)。無他,由香港著名眼科醫生林順潮開辦嘅,實力有晒保證,還有馬化騰、邢李(火原)等名人作基石投資者,更添星味。還有一點要留意,希瑪眼科入場費接近6,000蚊,銀碼相對較大,只要升兩成便有1,000蚊利潤,比起那些3,000蚊入場要升四成才有肉食,來得更划算,畀100蚊抽番一手當買六合彩都好吖。
其餘新股也可留意正榮地產(6158),根據中國指數研究院報告,集團乃中國最大未上市房地產開發商之一,以近期內房股熱炒氣勢,正榮有望借勢炒一轉。
唐牛fb專頁