【魚樂無窮】從誠哥身上學炒股（唐牛）

誠哥終於退下來了，在眾多的告別寄語中，令我感受最深刻的，不是長和（001）、長實（1113）股票只買不賣，而係佢憶述1972年長實上市，包銷商建議招股價13元，但他強調訂價要3元。「凡事太盡，緣份勢必早盡。」誠哥呢個鮮為人知的舉動，正正完美示範呢個做人道理。有咁上下股齡的戰友都會認同，股票市場總不能賺盡，要留番一定水位給下家，才能長炒長有，長實呢個活生生例子，值得借鏡。集團之後發展的地產項目水位如何，則屬後話。

今日上市的捷榮國際（2119），其實同樣有着給水位大家賺的基因。集團公開發售錄得超額認購162倍，絕對有條件以上限2.19元定價，但最終卻選擇以中上限價1.98元落墨，實行與股民同樂，結果暗盤亦不負眾望，埋單有近一成升幅。

講開捷榮，大家一定會聯想天仁茗茶概念股賓仕國際（1705），一隻咖啡一隻奶茶嘛。你問我捷榮係咪可以好賓士咁炒得咁勁，我答你可能性極低，事關天仁茗茶上市市值僅4億元，連殼價都未到，捷榮市值十幾億，要倍倍聲咁升難度極大，但觀乎市場氣氛轉好，加上平安好醫生（1833）也成功上水，捷榮用招股價上限2.19元內入場，用招股價1.98元止蝕，都有一定值博空間。

唐牛fb專頁

http://www.fb.com/tongcow88