【魚樂無窮】捱埋今日雨過天青？（唐牛）

圖片來源：REUTERS/Bobby Yip/File Photo

今個星期過咗4日，恒指跌足4日，噚日再急插446點，失守29200大關，相信不少戰友越撈越驚，對升穿32000點大關有所動搖，買衍生工具嘅更加係腳震，因為損失以倍數計放大。都係那句，高位波動難免，頂唔順嘅寧願減磅，勉強無幸福。

講開衍生工具，有報道指騰訊（700）於380至397元有14.5億份牛證街貨，相當於1,400萬股正股，以昨日收市價398元計，市值高達56億元，由於輪商要為牛證對沖，如果騰訊跌穿380元大關，輪商亦要沽出相同價值的正股。

心水清的戰友一定會話，要有誘因推低騰訊股價，才會引發惡性循環嘛，咁有乜力量可以推冧股王呢？似乎不出兩個︰第一，美股科技股繼續隊。呢個同叫你估恒指今日收市升定跌一樣，冇得估，亦唔好浪費氣力估。第二，恒指rebalancing，騰訊要降比重，嗱嗱嗱，呢個就有數得計，由11.58%減至10%。幾時要做嘢？可能一直做緊，重點在於今日收市後就會生效，意味指數基金減磅行動會完結，騰訊沽壓一定會減少，從心理和實際角度出發，都係好事。

執筆之時正值深夜，道指強勢升穿24100大關，納指亦有所反彈，如果埋單keep住強勢，今日恒指理應有運行。另一科技股舜宇光學（2382），今日收市後亦會正式染藍，指數基金尾市定必掃貨，噚日沽得咁緊要，今日彈一彈好正常吧，短炒不妨留意！