【魚樂無窮】港交所睇幾多?你有力坐到尾先講!(唐牛)
港股終於破頂,一騷十年之癢,可喜可賀。數數手指,1月只過了13個交易日,恒指已累升2,202點或7.4%,唔好講跑贏大市,要同大市同步都唔係易事。以自己為例,倉位已集齊藍籌四大天王︰滙控(005)、港交所(388)、騰訊(700)及平保(2318),但表現依然跑輸大市一大截。無他,手上還有一堆橫行中的績優股、GO股及高息股,直接將回報接低。
點解唔沽晒佢哋all in強勢股?一個正常及健康的倉位,必須有進攻股及防守股,為追回報採取全攻型打法,一旦遇上調整,只要心理質素較差,便會做錯決定,止蝕輸錢事小,走甩買唔番事大。從這個角度出發,跑輸大市實屬非戰之罪。
港交所(388)昨日一度突破300元大關,強勢畢呈,本月暫升24%,如無意外將成為一月之星。要踢穿終極蟹貨區311.8元,相信只是時間問題,反而大家最關心的,乃往後還有多遠的路可以走。388蚊?還是500蚊?擺在眼前的是,港交所利好消息一籮籮,除指數創新高利好成交外,還包括北水持續湧港、同股不股權落實、H股全流通等等,全部都係實實在在,絕非2007年那架最終無影的直通車,與其夾硬要估頂,不如問自己有冇定力坐到尾吧。無論如何,今年的港交所,將為成為去年的騰訊︰倉位冇佢嘅話,必定跑輸大市!
唐牛fb專頁