【魚樂無窮】聰明錢再搶高息股？（唐牛）

客觀事實係，10年期美債息慢慢回落，昨日傳統高息股如中電（002）、煤氣（003）、香港電訊（6823）等齊齊破位，似乎有聰明錢率先進場了。

股王騰訊（700）交出一份稍勝預期的業績，足令股價挾到飛天，證明事前看淡資金遠較看好為多，結果出現大成交挾倉場面。不過，挾倉還挾倉，與轉勢係兩回事，在高增長神話破滅下，騰訊未來的路肯定更難行。從圖表出發，300元水平阻力極大，短炒的朋友轉身記得要快。

近期市場另一個焦點，必數跌跌不休的油價。除創出最長的跌浪外，更已步入技術性熊市（高位回落兩成），在港上市的三桶油，無可避免捱沽，但受惠的內地航空股，升幅卻不合比例地細，可能被人民幣拖着後腿，太多因素左右，所以我甚少推介這個板塊，更遑論落場炒了。

唔少分析認為，油價只是調整不是跌入無底深潭，但我覺得最重要是特朗普講明，「油價應遠低於現水平」，以佢處事作風，一定無所不用其極推低油價，短線不易翻身。最理想的劇本係，企業成本降低，通脹降溫，儲局加息理據又少一個，收水速度減慢，加上美元回軟，股市必然受惠。係咪真係咁理想？當然要由時間驗證，但客觀事實係，10年期美債息慢慢回落，昨日傳統高息股如中電（002）、煤氣（003）、香港電訊（6823）等齊齊破位，似乎有聰明錢率先進場了。

唐牛fb專頁
http://www.fb.com/tongcow88