香港股市 已收市

【魚樂無窮】錯過升浪 絕不需要可惜(唐牛)

要食正呢個突如其來嘅反彈浪,一定要眼明手快。

股票市場果然千變萬化,一分鐘都嫌多。上星期本欄先講指數跌咁多,但好多股票都買唔落手,結果美滙指數在特朗普出口術下回落,風險胃納即時上升,指數六日累彈逾千點。

當然,要食正呢個突如其來嘅反彈浪,一定要眼明手快。眼明,即係要睇到資金流變化,中電(002)、領展(823)輪流急跌,意味避險資金重投股市;手快,當然係當機立斷,在確定轉勢一刻衝入場,遲些少值博率都已經欠奉。所以,如果唔係經常性坐在報價機前,錯失呢個機會係絕對正常,亦不需要覺得可惜。

舜宇光學(2382)周一出手回購,雖然只係15萬股,以回購價83.3至84元計,涉資只係1,258萬元,但足以激起千重浪,股價翌日彈高近9%。回購通告提到,當前股價偏離公司價值,並可能根據市況作出進一步回購,以顯示管理層對公司長遠策略及增長充滿信心。有趣的是,回購只做了一日便無影,係咪大彈後股價已重回正常價值、抑或公司只希望借市場力量頂住股價?要由時間去驗證。

至於值唔值博,我只能夠話,回購唔會令業績變好,要股價重展升浪,一定係靠盤數帶動。集中炒回購消息的話,寧願等集團再度出手,多一個參考價格才部署吧。

唐牛fb專頁
http://www.fb.com/tongcow88