【魚樂無窮】2018年第一個願望(唐牛)
強積金顧問公司發佈全年強積金表現,整體平均回報18.2%,為2000年推出以來第三高年度回報紀錄,每名打工仔平均賺2.8萬元,以絕對值來說尚算吸引。不過,當你發現原來今年all in 盈富(2800)都有近四成回報,而股票基金升幅只得32%時,就會明白強積金其實有幾搵笨。積穀防饑原意係好,但辛辛苦苦儲落嘅血汗錢,有一部份竟被一班完全冇作為嘅人抽水,點計都係離晒大譜。你問我2018年有乜願望,取消強積金一定係首選。
理財從來係不死話題,事關打工仔嘅夢想就係唔使做,所以被動收入足夠糊口嘅話,就可以炒你老闆魷魚,要達成呢個心願,正正就係理財問題。財務自由最佳方法,一定係錢搵錢,如何搵到足夠本錢,不外乎兩招︰開源及節流,當中開源又一定比節流重要,無他,坐食一定會山崩,懂得印銀紙才是上策。
「講咗咁耐,究竟有乜開源方法?」這視乎閣下有乜嘢技能,有人會選擇打多幾份工,有人會選擇搞小生意幫補,我就最簡單選擇炒股。相信又會有人搶問︰「點樣可以日日賺錢?」記住,炒股票係長途賽,有輸有贏好正常,最重要拉勻計有錢贏,如果諗住日日贏錢,最終只會因炒得太頻密輸鑊甘,一來心理壓力太大,二來炒股要畀使費,入場那一刻已經輸咗!
唐牛fb專頁:http://www.fb.com/tongcow88