雅虎香港財經 【BizStarter】裝修佬創業 老婆不離不棄！捱出頭獲千萬融資
有人靠伴侶建功立業，有人為伴侶放棄飄泊。曾詠文（Andrea）五年前認識Andy的第一印象是：「覺得佢已經係一個成功嘅老闆。」未婚買樓，按揭遲遲未批，逼到男友自爆官司纏身。真相在前，她沒晴天霹靂，沒聲嘶力竭，只淡淡然地說：「有問題就解決。」
Andy創辦的公司最差試過半年無糧出，她是時裝設計師，當時她轉到新公司，跟個像嫁了給公司的韓籍單身女人，即使恐怖到要返朝九晚二，仍死頂5個月，無非撐住頭家。
3年，好彩只是3年，男友變老公。當初Andy忽發奇想的「我要裝修」網站變成「裝修佬」靈魂業務之一，現在成為「裝修佬」合夥人，今天獲千萬融資，叫修成正果？其實笑到最後才是贏。
Andy名叫劉天生，父母在他幼年分離，媽媽替他改名「天生」，天生天養，期望順應天命，卻培養出「我命由我不由天」的不信命個性。細時唔讀書，大個駐內地賣牆紙布藝，男老闆將他視如己出，送西裝，委以重任，他視老闆如爹，公司如家。2011年家變，老闆找姪女接班，自覺鞠躬盡瘁卻被屈做二五仔，那刻除了哭，便是哭。
「趁後生」、「唔做會後悔」、「創業失敗大不了返去打工」朋友縱容的字句不知午夜夢迴多少遍，公司新接班人一句：「千祈唔好咁信任某一位同事」更觸發他中年危機提早降臨，「如果我人到中年，佢因為呢句說話炒我，我就兩袖清風」，遂萌生創業念頭。
以為後生輸得起，卻可能輸到貼地。夥拍舊同事另起爐灶，稚嫩地跟舊公司賣相同產品，「就係咁樣瀨嘢，瀨嘢就係公司覺得我搶咗佢嘅資源，出嚟撬佢啲客。」舊公司向他們作出起訴，人生第一次收到律師信那刻「騰哂」。官司纏繞5年，過程煎熬，他深信「佢（舊公司）係諗住滅咗我哋。」最終疑點利益歸於被告，這單官司共消耗他們十多萬元。
前度女友不是大難臨頭各自飛，Andy沒怨恨，只怪自己當時：「收入唔穩定……無糧出係煎熬，好多人經歷唔到……佢（前度）屋企人覺得打份工仲好啦…」七年感情告終，「令我更堅定係創業呢條路上，始終有個唔服輸嘅心態。」
自我隱閉半年，重拾心情朋友聚會，認識Andrea，同是天涯淪落人，Andrea笑著懷緬對他的第一印象：「陽光」、「正氣」、「覺得佢已經係一個成功嘅老闆」，慢慢知道是一人公司的老闆，「嗰下無乜嘢。」
打得火熱，未婚買樓，聯名以約280萬元買入深井豪景花園一個兩房單位，君子協定講明合作投資，日後分手賺蝕均分，一成首期九成按揭，問題來了，銀行遲遲未批按揭。Andrea回想：「有一晚，佢半夜捉我傾計，因為果時銀行一直未批我哋按揭，佢話其實我有單官司同舊公司有關，導致做唔到按揭。嗰下我嘅心情係，嗯…有問題就解決。」
回想當初困局，訪問當刻不禁流淚……Andy仍記得那時的感覺：「嗰時我好驚訝，點解唔同一般女仔好激動咁嗌晒分手。嗰時剩係諗，如果撻定，點同佢屋企人交代。」最終不知前世做了甚麼好事，Andy有位好朋友借50萬元給他渡過難關。
官司由2011年纏到2017年，Andy公司又大半年無生意，Andrea說：「明明月頭畀家用，但去到月尾或月中先畀，越嚟越遲畀，點解唔可以早啲？點解咁遲嘅？」後來無意中知道男友無糧出好耐，「開始驚，開始擔心，擔心佢無嘢食、無錢搭車。」
守株待兔必餓死，Andy決定開多「我要裝修」網站，一個提供予住戶與家居裝修公司的配對平台，從事斡旋工作、提供裝修知識等等。Andrea稱：「唔理啦，是但啦，盲目支持佢啦!」報讀autocad，替他網站設計商標。
「我要裝修」網站運作半年零收入，不如搵份工打下？Andy坦言：「定咗條線畀自己，如果一年後再無乜起色，就真係考慮放棄啦！」、「咁多年一路創業，覺得如果影響自己無所謂，但影響到身邊人，覺得超內疚！」他續稱：「好似望唔到前路，創業搞到自己生活唔穩定，想為另一半提供穩定的生活。」
Andrea插咀：「佢成日都動搖，但每一次支持佢！因為我知道佢創業呢條路，當初落決定已經好難，願意去行，捱咗咁多年，當中一定會有問題，有問題咪解決囉！同埋我覺得自己好自私，佢要返去做打工仔背後係因為呢個家、因為我嘅話，未至於囉！既然選擇得同佢一齊，應該係一齊去行呢條路。我有做嘢架嘛，所以我份工係唔可以無。」所以當時跳槽新公司，韓籍單身女上司似嫁了給公司，捽到她很多天工作時間是朝九晚二，仍捱足5個月才回巢母會。
「咁我愛呢一個人嘛，我鍾意得佢，我就接受佢呢樣嘢，你選擇得同佢一齊，你知道佢背景，你就要支持、包容，盲撐就梗！」
準備放棄「我要裝修」之際，同行「裝修佬」出現拉攏成為合夥人，聯同「裝修防伏專家」、「裝修華」成為裝修網站平台的三大業務，令「裝修佬」平台提供更多服務，包括家居裝修配對、裝修DIY、網上商城、品牌及產品宣傳推廣。
發展2年多，裝修佬獲得投資者融資，Andy開懷地說：「係一次性投入8位數字資金，畀我哋繼續發展。可以講收成正果，確定平台發展方向係可行。」獲得資金後優化業務，例如配對系統智能化、裝修商城由線下擴展到線下，在屋苑提供裝修用具及產品自動售賣機。
由一人公司到被賞識做合夥人，「One man band係辛苦、係蠢，創業真係唔好one man band，玩死自己!」創業十年，無時無刻想過放棄，但最終真是天生自有天養，「每當經歷低潮，都諗呢個決定係咪啱，其實返去打工可能更加舒服，因為天冧落來都有人幫我頂，唔需要我去諗解決方法，但創業係帶畀你無限嘅樂趣。當你跨過一個難關，諗返轉頭，咦！原來當初嘅難關，我差啲失敗，差啲就返去打工。」
採訪：陳家雄、余曉芸
撰文：陳家雄
影片編撰：余曉芸
攝影：馮峰 卓振輝 釗@realfinder
剪接：劉曉彤
編導：李楝芬
編審：倪敏慧
