三大中國貨 美國製造有著數
富士康在美國搞廠有大額補貼又唔一定要只請美國人,揭示原來玩「美國製造」有好多著數,如果內地想在貿易談判上釋出善意,容許內地企業到美國搞廠,有乜大企業最適合玩「美國製造」呢?
日前傳聞富士康在美國威斯康辛州工廠因為請人難,有意從內地調配工人到美國開工,消息傳出後美國輿論嘩然,狠批威斯康辛州豪擲45億補貼係倒錢落海。雖然事後富士康極速否認,但建廠協議其實未有承諾工廠空缺都要請美國人,而且有日本媒體爆料指富士康美國工廠規模將大縮水,由生產大屏幕改為細屏幕,難怪威斯康辛州本地人大都認為當地政府今次做了冤大頭。
不過從營商角度看,富士康今次作了一次精明示範,在美國設廠又與侵侵搞動土騷,既可以打好與美國政府關係又賺到大額津貼,算盤實在打得漂亮。如果中國有意緩和與美國緊張關係,為內地巨企赴美國設廠開綠燈,至少有三種生意可以作為先頭部隊。
首先係內地人瘋愛的淡水小龍蝦,此物其實源自美國路易斯安娜州,被內地企業積極養殖後,除了內銷更可以外銷到歐美。如果在美國設立繁殖場及加工廠,冠以正宗原產地兼中國專家監修,突變高級食材在內地市場相信亦不愁銷路。
其次係內地人熱炒的高級白酒,主要原材料高粱,美國正是重要出口國之一。除了材料,釀酒另一條件係好水,美國不缺一流水源,在當地設廠生產特別版,在內地市場叫價能力一定倍增。
最後係汽車,汽車業係中美貿易角力重要環節之一,假如想釋出善意,可能要由早前獲內銀逾萬億人仔授信的一汽出手,在美國設立高端車廠,生產標榜以人手製作的紅旗汽車。此舉一方面可以製造就業機會,亦有助重振紅旗汽車這個國家級品牌。試想想充滿祖國情懷的品牌,竟然由老外加冕,必定大受旅居海外的高官子弟歡迎。
內地巨企到美國設廠,企業高層及內地富人亦可能會率先炒貴當地物業,即使提供到工作機會,但當地人有工無屋住,民怨可能較有廠無工做更大,到時可能就在美國本土爆發口袋裡的「貿易戰」了。
===============
財經精選資訊網站「中環街市」 臉書粉絲頁