不如借力阿里辦書展

.

疫情再爆發，貿發局順應民意宣布書展延期，但疫情走勢反覆，一再延期都唔掂，或者書展Plan B可能係要搵阿里集團幫手變身光棍節。

網上書展「兩座大山」

近大半年網上購物、叫外賣已成為新常態，實體書展行唔通，大家都自然會諗點解唔轉搞網上書展。這個書展Plan B在三月時台灣書商面對國際書展被取消困局時都探討過，但結論係未必如想像般行得通，原因係有要克服「兩座大山」。一是疫情期間網上書店銷量未見明顯上升，意味即使搞網上書展，買氣亦應該遠不及實體書展。二係面見人氣作者機會，實體書展提供難得的機會予讀者及作者見面交流，但網上書展就較難發揮此功能。

.

但對強大的電商巨頭而言，山再大都可以移動。參考阿里策動的網上購物節，這「兩座大山」都唔係問題。首先係銷量，買嘢最緊要講氣氛，電商有大把資本炒熱氣氛，甚麼「5蚊」一本書、海量限時優惠、國際級巨星做倒數嘉賓都只係小菜一碟。假如貿發局搵阿里做合作伙伴同行搞網上書展，參展商門檻亦大為降低，以量取勝，要炒熱成為全球華人盛事可講輕而易舉。

至於第二座大山讀者與作者交流，現時由電商策動的購物節重頭戲網紅直播促銷，已證明網上互動交流的威力，只係香港比較慢熱。作者變身直播網紅另一好處，係讀者毋須再像書展講座般要舉手發問，可以即時在互動討論問問題，對怕醜讀者來講反而更具吸引力。至於親筆簽名就更簡單，直播期間落單，頭X千本可獲作者親筆簽名，讀者亦唔使身水身汗排隊。新晉作家可以更進一步，講明頭一百個買書名額，將由作者變身速遞員約讀者親身交收作為買書驚喜，有了這些甜頭，網上書展促銷威力就不下於光棍購物節了。

.

假如書展搵阿里集團幫手，接力登場的動漫電玩節亦可以諗下搵騰訊幫手變身網上電玩節，反正近幾年騰訊都有開攤位參與，由騰訊牽頭更可以引入國際遊戲商、動畫公司參與，幫手催谷動漫電玩節人氣。

看長遠一點，新冠肺炎個勢似會成為風土病，可能在地球永久存在難斷尾，隔一排又再爆發。如果網上博覽會行得通，長遠巨型展覽場地需求退潮是必然趨勢，餘下問題便是，會展可以點轉型了，如果又係轉型做商場或服務式豪宅，實在不免可惜。

===============

精選資訊網站「中環街市」 臉書粉絲頁