廣告
香港股市 已收市
  • 恒指

    16,541.42
    +148.58 (+0.91%)
     
  • 國指

    5,810.79
    +82.66 (+1.44%)
     
  • 上證綜指

    3,028.28
    +17.62 (+0.59%)
     
  • 滬深300

    3,525.85
    +4.89 (+0.14%)
     
  • 美元

    7.8250
    -0.0006 (-0.01%)
     
  • 人民幣

    0.9226
    -0.0002 (-0.02%)
     
  • 道指

    39,807.37
    +47.29 (+0.12%)
     
  • 標普 500

    5,254.35
    +5.86 (+0.11%)
     
  • 納指

    16,379.46
    -20.06 (-0.12%)
     
  • 日圓

    0.0514
    -0.0000 (-0.04%)
     
  • 歐元

    8.4307
    -0.0098 (-0.12%)
     
  • 英鎊

    9.8720
    -0.0040 (-0.04%)
     
  • 紐約期油

    83.11
    -0.06 (-0.07%)
     
  • 金價

    2,254.80
    +16.40 (+0.73%)
     
  • Bitcoin

    70,326.06
    +335.66 (+0.48%)
     
  • CMC Crypto 200

    885.54
    0.00 (0.00%)
     

住邊區嘅人最慘 馬鞍山、天水圍、長洲各自各辛酸

馬鞍山篇:

我住馬鐵沿線,而我喺港島返工
我覺得我比住大西北或者將軍澳嘅人更堅,
因為小弟每日都要轉五次車返工放工。

 

同其他打工仔唔同小弟因為每朝返工都要不停轉車嘅關係,
所以通常都無時間喺車上恰陣,
正所謂「恰一陣成千古恨」吖嘛。

 

延伸閱讀:

出嚟社會打工 唔通唔識擦鞋就冇運行?

兩個90後叻女 做地盤同飛機工程師唔輸蝕

同大家講吓到底小弟係點返工。
首先因為小弟住嘅地方離最近嘅馬鐵站一啲都唔近,
所以每日要先搭一程小巴到馬鐵站,
而每朝嗰條小巴站嘅隊都會排晒長龍,
所以小弟要比行車時間提早15至20分鐘不等出門口。

 

去到馬鐵站,
因為唔係喺總站上車,
所以每次上到車已經無位坐。

 

去到大圍站,
車嘅班次永遠都唔夠人龍積聚嘅速度快,
無論啲波板糖人點叫啲人行入車廂中間,
啲人都係一於少理,自己上到車就算,
加上係東鐵線,
唔知點解啲拖喼嘅人如果搵唔到位坐就一定係連人帶喼塞正係車門。

所以每次小弟一定行入車廂中間,
良心其次,
而係車廂中間真係舒適萬分,空間夠我跳返part舞耍個太極。

 

好喇兩三班車走咗後我終於上到車,
唔夠五分鐘又要準備逼落車。
九龍塘啦嘛。

 

其實我真係好唔鍾意啲人車未停定就郁嚟郁去想痴實個車門,
明知大部分人都喺度落架啦,
你急乜嘢呢?又逼人要同你HI身HI勢咁,

 


有啲以為自己好有禮貌嘅會喺度「唔該唔該」,
有時真係忍唔住話:
「你唔該我都無用,我唔該你等車停定再跟住人落唔好未到站就喺度唔該唔該,唔該!」

廣告

 

開車門嘅叮咚聲唔知點解會畀部分人當咗係起跑嘅槍聲,
一開車門就總係有人跑馬咁跑去電梯。

 

因為小弟每日會喺九龍塘站嘅同一個位上落,
所以留意到一位好特別嘅車站助理嬸嬸,
每日朝早都拎住個大聲公,
但佢唔係背嗰啲小心呀嘅對白,
而係「唔該你哋班人全部落返去!同我全部落返去!」

佢把聲真係好鬼響,
當咗你班人喺鬼門關偷溜出嚟嘅小鬼咁,
佢就負責捉鬼咁鬧返哂你班乘客落去。

 


初頭覺得佢好鬼煩,
依家亦唔係對佢好有好感,
不過見佢好似幾enjoy咁,
反正都係畀佢煩嗰幾秒姐,
所以後來都無咁在意,
有時佢調咗位仲會有啲掛住佢把聲,好有老媽的感覺。

 

左轉右轉落去往黃埔嘅月台,
每次都希望今日啲電梯唔好又壞。
同大圍一樣,都係要等兩三班車先有得上的。

 


唔知有無人同我一樣覺得,
石硤尾上車嘅朋友都識縮骨功,
明明九龍塘啲人都上唔到,
佢哋都會上到車,
成日都係喺門口位嘅我,
又唔會覺得佢哋逼到我架喎!
不過有時真係爆得滯嘅時候,
又會覺得石硤尾嘅朋友好慘,
成日都唔知幾時先上到車。

 

去到旺角,
對面月台已經積咗一大堆人,
不過比起大圍同九龍塘,
喺旺角上車又好似無咁辛苦。

 

好喇經過幾個站,
我哋嚟到大佬金鐘喇,
金鐘啲人真係特別鍾意跑落車,
成日都見到剛剛畀人讓座嘅公公婆婆一到金鐘就成個人精神晒,後生咗幾年咁
真係見到都鄧佢哋開心!坐一坐就返老還童!
唔怪得政府成日都叫我哋啲廢青要讓座啦!
可以慳返啲醫療開支吖嘛!

 

 

千山萬水,轉咗五程車之後,
小弟終於去到返工個站。
不過仲要克服條奪命長斜路,
先可以去到出閘機度,
嗰度快則五分鐘,慢則十分鐘,
令小弟每日都好感恩自己無腳痛問題,
如果唔係就要好似董伯伯咁專心做廢青喇。

 

經過一日嘅辛勞,
我又要重覆返以上嘅步驟返屋企,
而呢種生活,
我已經堅持咗差唔多五年,
不過我知身邊嘅五六七十後都係唔會畀個讚我,
所以其實都無乜嘢姐:)
只係比大西北朋友轉多程車、又一樣無哂social life咋嘛:)

天水圍篇:

住天水圍最大嘅煩惱就係搭車!問十個天水圍人有十一個都係咁講!同新界西其他地區例如屯門一樣,本身搭車出市區已經耐,時間夜啲,返屋企所需嘅時間就更耐!

 

車費貴轉車轉到暈

我喺將軍澳返工,由天水圍去將軍澳,搭港鐵要轉3次線,單程車費要$23.5、來回就差唔多50蚊,車程最少一個半鐘頭;有時放工放凌晨1點,身心已經十分疲倦之際,仲要由將軍澳去旺角轉車返天水圍,至少3點半先返到屋企,係咪想我哋困喺天水圍成世唔出嚟呀!

 

買餸貴到傻

自從天水圍三個街市,天盛苑、天耀邨、天瑞邨畀領展收咗,一個裝修完到另一個,搞到啲居民為咗買餸要走嚟走去。裝修完之後就加租加價,仲要少咗好多舖位,多咗好多連鎖店,以前嘅小店都無晒啦,啲菜都愈來愈貴啦!

成世改壞名

多得「悲情城市」呢個名,其他人一聽到我住天水圍,第一句就會問天水圍住啲人係咪真係好慘。「悲情城市」係2006年嗰陣,當時仲係政府民政事務局常任秘書長嘅林鄭月娥形容天水圍。以前天水圍真係有好多倫常慘劇,不過,經過那些年,天水圍已經唔同咗喇,唔洗驚。講真,我都幾喜歡呢個社區。

 

長洲篇:

近呢幾年香港人好似嫌咗行商場,時不時就見到啲FRD upload行山相,再加上成日見到啲咩搵個會陪你行山嘅女朋友咁嘅潮文,成班友就一個二個狗衝上山為求打卡,搞到依家啲山路都一岩一忽。

 

但我唔想再講嗰啲偽山系,今次重點係嗰啲又唔想行山又要扮親親大自然,所以假期就仆入西貢或者我家門口長洲嘅人!

 

1.乜鬼都要排長龍

乘住嗰股自然癮,搞到越嚟越多人放假就狗衝入長洲,而我哋呢啲真係住長洲嘅一到放假就唔敢出街,因為出咗去都唔知幾時先有得返入嚟!個個朋友都以為我住長洲嘅一放假就係上山玩嘅時候,其實我係宅到不堪!因為出街真係好辛苦!

 

一到放假,長洲真係多人到就嚟企都企唔到!有時我覺得呢度人仲多過上水嘅水貨集散區咁,啲賣大魚蛋嘅鋪頭大排長龍就預咗,但因為越嚟越多人嘅關係,度度都好多人排隊,想食個外賣都有排等!

 

2.垃圾全部都係垃圾

同埋到底你哋班人知唔知,其實紅日時候碼頭附近係唔可以踩單車架?同埋你哋啲踩得唔叻或者唔識踩嘅,唔該唔好入嚟長洲當呢度係練車啦,長洲啲路其實條條都好窄,你哋班炸彈令身邊嘅人身體安全構成嚴重威脅!

 

仲有你哋班人狗衝哂入嚟,個個做生意嘅貪你哋無得揀就所有嘢都吊高嚟賣,你哋可能當自己去旅行無所謂,但你哋知唔知班居民就被逼同你日日捱貴嘢!?

 

唔好成日呢頭話大陸人通街掉垃圾、吐痰、放黃金,嗰頭自己又一樣咁無公德心啦唔該,次次放完假,長洲都好似畀喪屍攻陷完咁,通地都係垃圾,我已經不下一次見住啲人明明大大個垃圾桶喺隔離,係都要考自己眼界咁掟啲廢物入去但又唔中,結果就笑笑口咁走咗佢就算!

 

又或者啲人見到垃圾桶滿咗,都係就咁堆啲紙巾、飲品盒上去!你哋成日砍頌西方人好文明,咁唔該學吓人帶住個垃圾膠袋喺身,個桶滿哂,就自己收返好自己啲垃圾,等到下個唔滿嘅垃圾桶你咪再掉囉!再唔係咪出返港島先掉囉!尊重吓附近啲居民係咪真係咁 難呀!

 

3.粒幾鐘等船返歸

最最最重要嗰樣,就係畀你哋班人搞到我要花好長時間先上到船出入長洲呀!一啲真係好多人嘅假節日,船公司都會加密啲班次,但係加完都載唔哂啲人走!

 

大佬呀,我想返屋企啫,洗唔洗搞成粒幾鐘去等班船呀!前幾年有人發起簽名運動,話應該畀我哋長洲居民優先 上船,我哋諗住有望啦,可以唔洗再嘥啲無謂時間先返到屋企,但點知政府話無迫切需要呀!佢哋呢班坐冷氣房嘅人完全睇唔到我哋有幾慘呀!

 

又有人話應該為長洲旅客人數設上限,其實我覺得比起畀長洲居民優先上船呢樣嘢係無咁緊急嘅,不過如果人數再多落去,我哋個島真係沉都有之!

 

其實最緊要係,唔該各位入嚟嘅人做吓好心有返啲品,你哋入嚟玩,玩得開心之餘,唔該你哋畀返個生活空間我哋,唔好對我哋嘅地方用完即棄話之佢變垃圾墟先得架,係咪咁講先!?

延伸閱讀:

得咗 7個要求加人工的方法