住長洲係人生贏家?
今日本港最大單嘅新聞,係長洲發生1.4級地震。
對香港而言,1.4級一定係大地震,唔少市民議論紛紛,有人迷信話係天降異像,有人就感慨,話香港不是「永遠的福地」,1997後已開始變質,今次係不祥之兆云云。
不過唔講政治,筆者反而諗起,近年慢慢漲兩三成嘅長洲樓價,會唔會有機會回落呢?
長洲樓市八成買家為本地人,以350呎細單位較受歡迎,通常200多萬就有交易,如果要平的,最新東堤小築2期今年4月爆發運動前都有交易,350呎單位148萬成交,呎價約4229元,而上月底亦有成交,350呎2樓單位170萬成交,呎價4857,你睇無跟市區二手樓跌價就知道仍有需求。
其實自從香港爆發大型示威運動,一早已經有人熱議長洲好住,仲話今時今日最好就係住長洲,佢哋覺得:
村屋比私樓安全
交通影響微
食住行充足
空氣較市區好
易上車
有人甚至講到,住長洲才是人生贏家。
1.4級地震,應該就震唔走樓價嘅,你睇經常地震的日本,都有人吹捧成黃金投資機會,睇樓團月月出發。
只係今時今日,如果真係要「定居」長洲,你就要接受「長洲賓客人數多」嘅環境生態,區內人口老化,一放假卻人多到水洩不通,再加上離島一定係政府未來發展重心,到時環保生態問題會唔會受影響,都係未知知數…如果本港加強水路交通,會唔會有更多賓客影響寧靜生活?到時搬出搬入,又花一筆。
所以,住長洲同投資長洲樓最好分開,要三思而後行。
===============
精選資訊網站「中環街市」 臉書粉絲頁