香港股市已收市

內地爆紅奶茶店 又贏「港式」

捷榮申請上主板,今日反而想寫一寫在內地紅透半邊天的喜茶。

喜茶係2012年創立于廣東江門嘅一個內地新興品牌,2015年底走進深圳、廣州,2016年得到IDG與天使投資1億元後,今年2月再進軍上海,目前全國擁有63家門店,早前最新動向係成功進軍北京,集團未來目標,係開100間。

喜茶賣嘅係創意奶茶,過往並唔算係香港人強項;喜茶嘅成功方式,似乎又係小米嗰招「飢餓營銷」,要客人排隊7粒鐘買一杯奶茶,成為一時佳話,內地媒體質疑到底有無請打手排隊,而官方慣常極力否認,有香港報章早前亦派人前往報道,直擊排隊盛況。

目前中國茶飲市場通常有三種公司,一種係由一間細舖,「參考」starbucks後改良風格做起,佢哋唔係靠「食老本」,更唔會靠吹自己係經典品牌,當初喜茶就係呢一類;第二種本身就係大品牌嘅新產品,內地老麥嘅「因味茶」便是一例,第三就係本身做開餐飲,引入外來品牌,過往橫掃中國一線城市嘅「港式」、「台式」便是一例,當然中國自家都有大把老茶飲企業,那就是後話了。

去片:

[embed]https://youtu.be/BLdVIUbP5Ac[/embed]

創辦喜茶的,係一位90後年輕人,佢好崇拜Steve Jobs,自言對奶茶看法很單純:

奶茶就是奶加茶。」

年輕創辦人唔係奶茶老行尊,更唔係港式奶茶、台式奶茶專家,但就係靠自己配方,2012年研發到一杯「芝士加奶蓋」,成為爆紅起點,到今日愈做愈大。年輕人曾經透露過,喜茶生意一般嘅每月營業額達到100萬元人仔以上,最好的可以做到200多萬,總共年銷售近10億元,呢個數,已經好好。

見住呢位後生創辦人,再睇返香港茶記、靚啡上市嗰種「收成feel」,立即感到,對比新一代掘起嘅內地品牌,港式總係少啲活力。

有內地記者問創辦人,喜茶賣奶茶到底有無對手?年輕人答,「喜茶沒有競爭對手」。無對手嘅意思,似乎係覺得,同老一輩根本唔喺同一個市場競爭。

茶飲是很大的市場,非常高頻的,同時又做得很不好,我們只是用心把它做得更好。這個土壤一直都在,只不過大家沒有好好種植,我們只是比別人更用心的澆灌它。

話總是說得總是漂亮,未必完全反映現實,不過相比喜茶,今日港式奶茶的確好難再出新品牌大開100間分店,強如翠華喺內地都係幾十間。

唔知讀者有無留意,要排好多個鐘買港式食品嘅日子,似乎已不復再。之前有內地朋友話,港式奶茶界早已衝出國際拎晒獎,但畢竟飲品唔係藝術品,唔update年輕人想飲乜,就只得cap舊客水。筆者好想反駁,但又講唔出口。

作為香港人,總係希望所有老品牌都可以,長江後浪推前浪,一代新人勝舊人。

===============

財經精選資訊網站「中環街市」  臉書粉絲頁