【全民派錢】點先可以預支一萬大元?
政府指派一萬元計劃六月底接受申請,預計八月底前錢會到手。如果想提早預支一萬大元,至少有三項途徑可以考慮。
錢到手即還
開宗名義回應派錢方案的貸款計畫首推WeLab的#HKCashDrop計劃,登記條件好簡單,年滿18歲、在職及有良好信貸記錄的香港永久居民就可以經網上申請。一經批核一萬大元最快可以於一日內存入申請人的登記銀行帳戶。
此計劃另一賣點係設有五個月免息還款期,即係申請人於五個月內還清一萬元貸款就可以維持免息,而第六至十二個月就會以個人化利率計算。按此規則,你可以視此計劃提供一項一萬元過渡貸款方案,讓你先應付等錢使開支,到八月錢到手就可以立即清還。
攤長輕鬆還
嫌五個月還款期太短,則可考慮以私人貸款計劃預支一萬大元。雖然相對稅務貸款,私人貸款利息較貴,但由於一萬大元唔算係大數目,攤長十二個月還款,總利息開支都係百多至三百多元,兩個人睇場戲加一餐飯都唔止呢個數。
借私人貸款,你可能會優先諗搵出糧戶口的銀行。不過應慳得慳,最好都係格一格價,皆因各銀行的私人貸款息率都有一定落差,而且大部分私人貸款都可以透過網上或手機申請。但要留意選擇了十二個月或指定還款期,就要堅守理財紀律按月按額還款,不要大安旨意等一萬元到手才啟動還款,避免要支付額外利息、手續費及影響個人信貸紀錄風險。
先使再預支
你亦可能因為遇上忽然開支而等唔切一萬元到手,例如炎夏殺到家中雪櫃及冷氣忽然同時壞,兩樣換新就差不多要一萬元。另一常見情況係在職進修人士,早前要放無薪假又因為慶祝母親節多添一筆開支,結果欠六、七千元才夠支付新一期學費。
碰到這類情況要急事急辦,最快捷方式係先用信用卡應付,再申請銀行的分期計劃攤長還。這方式另一賣點係借貸成本實惠,以滙豐「簽賬分期計劃」為例,一萬元簽賬分十二個月還,總手續費只係12元。至於中銀香港賣點係靈活,除了零售消費簽賬,現金透支、網上繳費及交稅都可以申請分期。當然選擇此方式必須嚴守還款紀律,否則任由分期滾存,在經濟逆境下就會令你財務負擔百上加斤了。