雅虎香港財經 
全民造星唔夠勵志？未做到真正全民
全星造星可謂電視界小李飛刀，每年一出例不虛發。今輯再次掀起話題，不過睇多幾集發現呢個人氣節目存在一個結構性問題，就係唔夠勵志。
或者試過睇到哭出來的你，會質疑集集都有參賽者克服困難，又聲淚俱下表示自己唔甘心好想紅，咁都仲唔夠勵志？香港係高度商業化社會，測量勵唔勵志唔係同你講情感而係睇成就。
全民造星最大問題，就係本港影視產業經呢兩年政局動蕩下卻未完成洗牌，由評判到導師，在娛樂圈成就昔日唔算頂尖，強在小眾知音，而導師林二汶以今時今日樂壇市道來講，幾可肯定未來係「教主級」，但目前相對Eason、鄭秀文、張敬軒等星，論賺錢力社會地位個人資產都係天與地之別，在有既定成見的社會，亦局限了節目的受眾。（軒仔支持造星3，有網民早提議軒仔做評判）
由有實力與品味但仍舊「手停口停」嘅行業代表做評判導師，某程度上都反映出娛樂圈難撈嚴重程度已跑贏大市，諗到呢一點，即使參賽者如何落力，你都會想像到即使拎埋大獎，呢個比賽造出來嘅星前程有幾閃都係一個問號。可以話過去有姜B加Error，視乎你想主力純本地市場還是希望一併劍指東南亞了。
另一個泄氣位係，冠名贊助銀行廣告「人人星級，全民加薪」，竟然係由監製花姐上陣，雖然收到節目效果，亦引起話題，但全民造星最後造出一個花姐，應該不是節目想要的效果。當想到呢一點，節目著力舖排參賽者點樣刻苦，評判導師點樣用心指導，勵志效果和份量都會大打折扣，當睇到嚎啕大哭的魔術師小妍，比賽後網上對全星造星依然單單打打，你就知對佢來講，評判導師其實有多重要？
幸好香港人睇才藝比賽，感動位永遠只係配菜，恥笑參賽者如何騎尼不自量力，又或狠批評判導師點樣唔識嘢先係樂趣所在。所以預計全民造星仍會繼續擔任電視台小李飛刀位置，每年新一輯吸收視例不虛發。
不過作為持牌電視台，一味「放負」都係唔太好。全民造星有自己「節奏」，不過如果想增加給港人感受得到的勵志元素，也不一定只找年輕人挑戰，畢竟步入中年大叔大媽依然有夢，入行幾年賺成球嘅保險經紀，可能其實佢係想跳老舞，而做一單刁賺幾十萬佣不是夢嘅地產代理，私下可能係美孚君好宴會廳「君好標哥」一類的民間歌手，如果全民造星真正「全民」，不同職業打工仔都上節目與評判鬥嘴，火花度都應該十足，勵志程度肯定爆燈。
「全民」將大大增加一間地區電視台的吸金力，單計「大支」保險經紀間中落下廣告，條數都算和味。
===============
精選資訊網站「中環街市」 臉書粉絲頁
