冇父幹又如何 月入萬五90後 我要買到樓

作為90後職場小鮮肉，同大部分Fresh grad一樣，覺得買樓呢樣野，吓?講呢啲?食得架?加上宜家樓市高企，想排公屋又唔輪到自己，就算做死一世打工仔，打死一世工都無可能買到樓啊陰公!

 

撰文：Candice

成功點靠父幹

啲人成日話咩「成功靠父幹」，買樓都一樣。早前啟德1號2期新樓開盤，傳媒訪問咗一位慈父，佢幫子女比咗$500萬首期，但試問又有幾多人有個有米老豆呀? 雖然我都想我老豆係李嘉誠！對於已經「輸在投胎前」嘅我，既然冇先天優勢，就唯有靠後天努力啦！我地呢班打工仔，都係抱住「我會做好呢份工」比較實際。

 

儲錢是常識吧

出到嚟社會大學做嘢，唔可以洗腳唔抹腳！畢咗業已經揹住筆Grant Loan債，小鮮肉想上到車，唔計住度住又點得啊。所以要清楚究竟想買咩樓，要買幾大，首期要幾多，供樓又要幾多，睇餸食飯。但搵到錢唔代表儲到錢，有咗固定收入，每月出糧後一定要儲起一部分，限住自己每月使幾多。如果有另一半都要保持財政獨立，可以嘅話可以公儲一份婆儲一份，為咗上車一齊拍住上。

 

不過，買樓又唔使零社交零朋友嘅，頂多有時頹食吓豆腐火腩飯或者譚仔咁啦，係friend嘅食乜又有乜所謂。好似我月入萬五，扣除家用、還Grant Loan、每月消閒食飯搭車、拍拖使費，冇乜奢華享受嘅話，至少儲五千都合理。如果有個月真係用多咗，頂多下個月減少消閒開支嚟填補返，或者同呀媽傾下有個月比少啲家用(如果佢肯)。至於拍拖使費，有嘅咪用多啲，冇就可以慳返，冇拍拖嘅人會懂的~

 

賺錢才是王道

買樓單單靠份人工同儲錢係無可能比到首期同其他費用，儲極都有限。以$300萬樓盤為例，如果做到按揭6成，30年供款年期，按揭利率為2.15，首期加埋其他代理佣金、印花稅乜乜乜都差唔多成$130萬。自問自己真係無本事喺有生之年儲到$130萬。所以，真係想買到樓，其實要先增加收入，為嘅係賺第一桶金，而一桶金好多時要靠投資賺返黎。

 

雖然對股票、基金、債券等投資工具冇乜概念，但為咗賺錢點都要去到盡，唔識就學到識！事前做好功課，睇報紙、雜誌分析、聽小道消息去入市炒賣唔少得！多了解理財同投資方面嘅知識，揀啱投資工具，量力而為。投資涉及風險成日都聽到，想喺投資市場獲利，輸錢係在所難免，但一定要輸得起，同埋見好就收。

 

按揭可以9成

年輕係小鮮肉嘅本錢。香港樓價高企，本身$300萬以下嘅樓盤已買少見少。如果想快啲買到$300萬嘅樓，自己又儲夠約$40萬首期，做9成按揭其實都可行，比起$130萬首期，點睇都輕鬆少少。

 

只不過，比咗首期仲要繼續供，自己本身只係搵萬幾，又點供萬幾蚊樓呢?有另一半的話，可以試下公一份婆一份，共同分擔下。如果冇另一半，就只好靠自己積蓄同投資賺返嚟，再唔係開頭可以先搵屋企人幫手負擔一部分，都係過渡時期啫。等自己工作上咗軌道，而且又賺到第一桶金之後，自己再慢慢供返都唔過分啊。