前財爺薯片叔叔:醫生、律師、會計師 20年內會消失
近日財爺阿茂波因為派錢搞到一鑊粥,仲要facebook上載一幅「背面波圖」,惹來網民公審,話佢唔敢見人,相當緊張。唔知阿茂財爺,見到前財爺可以無官一身輕講教育改革,會唔會都有少少心動想辭官呢?
話說前財爺曾俊華,大家都知道佢自從選舉完之後就一直醉心研究教育,成立咗知智庫叫「Esperanza 薯片叔叔共創社」,日前曾俊華作為代表出席一個教育論壇,終於發表咗佢哋嘅睇法,睇下你又認唔認同?
佢話今時今日仲講做醫生、律師、會計師呢啲職業,其實已經過時,仲話15年或20年內,呢類工種應該在某程度下消失﹗
當然前財爺補返句,唔係話專業會完全消失,只係社會對專業人士需求,往後會變得很不一樣。前財爺希望香港人可以多討論,多了解國際教育現況,要人反思「教育的目的是什麼」?
其觀點隨即引起網上討論,會計師會唔會被AI取代呢?bookkeeping會唔會死先?醫生會唔會被先進醫療儀器所取代?邊啲律師會無得撈先?香港一班家長,有無可能放棄要仔女做醫生呢個諗法?
無論點都好,小編永遠相信行行是出狀元的,唔係人人都得一條路,只不過,本港70後、80後父母本身於「專業社會」成長,要他們擁抱一個完全未知的願景,又真係有啲難度。
來源:Esperanza 薯片叔叔共創社
===================
19網輕鬆爆料熱線,歡迎舉報老細同事19惡行,立即click入去講畀我哋知啦