【移民加拿大】加拿大考車 持香港牌有乜著數?

·3 分鐘文章
加拿大考車-持香港牌有乜著數?
移居加拿大,車牌可能係生活必需品之一。

加拿大無架車出入唔方便,想揸車最基本係要有個牌,可惜香港牌無得玩直接轉換加拿大牌,要再考牌,揸香港牌仍有一些著數。

直接換牌無香港份

加拿大其實都有直接換牌機制,不過接受地區暫時只限美國、澳洲、奧地利、比利時、法國、德國、英國、英屬曼島、日本、南韓、新西蘭、北愛爾蘭、愛爾蘭、瑞士及台灣。香港牌無份情況下,假如你係遊客,可以在部分省直接用香港牌揸車而毋須拎國際牌,例如多倫多可以揸足90日。

但如果你係來居留、留學或工作,規定就較為嚴格,你只可以用香港牌在加國揸車60日,之後就要考加拿大牌先可以揸車。即使你選擇申請定國際牌爭取較長揸車寬限期,亦要留心揸國際牌不能購買汽車保險,所以都係快手考加拿大牌最化算。

雖然要「重考」,但揸住香港牌考車都有一些優勢。講解優勢前,先要了解加拿大車牌一般採用分級制。以安大略省為例,筆試合格就可獲G1牌,G1路試合格就可獲G2牌,五年內完成G2路試合格就可獲G牌。

G1牌限制相當嚴,持牌人須要有一名累積4年經驗持G牌人士同行,駕駛時必須零酒精,午夜十二時至凌晨五時不能揸車,大部分高速公路都不能通行;G2牌同樣要零酒精,不過限制主要針對19歲以下年輕駕駛者,19歲以下駕駛者頭六個月午夜十二時至凌晨五時只可以載一名同樣係19歲以下乘客,六個月後乘客可放寬至三人,如同行人士有累積四年駕駛經驗持G牌人則不在此限。其他省的車牌分級制大同小異,例如亞伯達省分為Class 7Class 5 (GDL及Full Class 5),想考牌就要睇睇自己居住省的規定。

加拿大考車-持香港牌有乜著數?
加拿大車牌攻略

持香港牌可越級考試

要留意持香港牌同樣要考筆試,考筆試可以到試場walk in應考,即使你在香港已試過考筆試,最好都係練下模擬試題,由於可以揀中文應考,所以對有駕駛經驗人士來講其實唔太難。

合格的話就可以拎到學牌,以安大略省為例即G1牌,通常要等一年至可以考G路試拎G2牌。假如你在香港累積2年駕駛經驗,就可以直接跳去考G2路試,G2路試難度在於考試時間較長,另外會考埋高速公路路段,在香港有揸車的話,主要係克服適應左軚車的問題,合格的話就可以一步到位拎到G牌。失敗就要回到G1 Road Test階段考G2牌。假如未滿2年駕駛經驗,仍可以跳過一年等候期考G2牌,一年後就可以再挑戰考G牌,持有G牌可以駕駛貨Van及小型卡車,有助擴闊買車選擇及增加搵工優勢。

至於點證明自己的駕駛年資,除了出示香港車牌,你仲要預先去香港運輸署申請駕駛執照細節證明(TD320)。另外整個考牌過程要在五年內完成,所以拎到G2牌後不要懶懶閒,否則又要回到起點重新考過。

伸延閱讀:

【移民加拿大】加拿大銀行開戶 有乜選擇?香港都開到?

【買起全世界】疫市升勢凌厲 多倫多尚有一類筍盤?

【移民加拿大】留學成移居跳板 了解加拿大學制

【移民加拿大】喺加拿大讀書畢業就可以直接拎到永居?

【移民海外】加拿大垃圾分類入門 掉垃圾都要裝App?

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能