雅虎香港財經 【大茶飯】原來姨婆係股東（青冰）
「姨婆掉眼淚」你一定聽過啦，Sammi加100毛加渣打( 2888)，係近期嘅網紅，本身渣打已經係一間潮嘅銀行， 今次宣傳的成功，令青冰的太太都話擺一球入去開戶有10萬miles，好抵咁喎，不過上星期除咗姨婆之外， 渣打的股東都有掉眼淚，事關佢地半年業績雖然優於預期， 但唔派息的決定令市場嬲嬲豬，翌日跌咗8%收市。
對於本港投資者，經常拿渣打及匯控(0005)相提並論， 因為大家都係英資背景，同是本港發鈔銀行，業務遍佈全球， 算係國際級銀行。但細心啲睇，匯控一直都強調自己歐、 美及港三頭馬車，盈利貢獻都相若，在艱難時互補長短， 不過渣打就非常側重在亞洲的發展，在剛公佈的半年業績，除稅前盈 利19.2億美元，有10億來自大中華及北亞地區，4億來自東南亞，歐美地區加埋只有6600萬。
匯控CEO歐智華話，對歐美經濟好有信心， 以一貫匯控大班從不吹水的往績睇，咁渣打未來係蝕底啲， 你睇業績記者會中，渣打CEO係話增長沒想像中的快， 在成本效率方面仍需努力，現在是公司轉型的初期， 迫切希望恢復持續的派息。兩者一比，高下立見，股東用腳投票， 亦都好合理吖，作為專業啲嘅老散，請不要聽人講係好消息出貨，唔派息就係跌嘅原因，況且現價亦只係七月中的位置，唔算太差啦。
股東掉完眼淚之後點做好？銀行股實在有太多好選擇， 先不說青冰的愛股匯控，佢個仔恆生(0011)業務穩定， 海嘯咁大件事都冇中斷過派息，今年升幅仲比渣打少； 另一間發鈔行中銀香港(2388)有一帶一路概念， 阿爺全力支持，賣完集友又有資金諗派特別息。雖然隻歌好聽， 開戶好抵，又有miles賺，但都係做客戶好過做股東了。
