原來已有2000人 中了「譚詠麟陷阱」

.

譚校長近幾個月好紅，親身撐警或未能在灣仔食咖哩等花邊新聞只是助攻，真正推手是社交媒體密密出現、以他大頭相作招徠的所謂投資廣告。金管局就透露按銀行估計，原來已有逾二千名「死士」睇完廣告落疊並透露信用卡資料甚至密碼。

平心而論，這一波譚校長投資智慧廣告製作都幾粗糙，而且譚校長經理人已多番以正視聽，咁都有逾二千人中伏實在震撼人心。

「二千死士」墜入校長陷阱離不開三大原因：

一係真心撐校長，譚校長近年在紅館開show仍有力加開日場，明顯有一定號召力，加上校長精叻、勤力、識做生意、愛國愛港，確實切合在年紀較大族群口味。所以當附有譚校長大頭相的「投資機會」廣告密集地在社交媒體上出現，真心撐校長族群便有可能認為這廣告有料到而落疊。

.

二係尋找出走加發達機會，聽校長金曲大又求穩定的族群，他們近月最常掛在嘴邊一句就係「香港好亂」，很自然會思考如何將穩住啲錢又可以順便發達。於是虛擬貨幣早年被人講到爛的出走兼避險好處，就剛好擊中他們的憂慮，而且譚校長「文宣」標榜有本小利大套戥功能，對深受八十年代精叻文化薰陶的一代而言就更添強大吸引力。

三係夠粗糙，此理由聽起來好離奇，但今時今日網上世界，流言造圖越粗糙反而越多人信，皆因不少人認為製作粗糙的「文宣」才有「偷偷講啲堅嘢你知」味道，更厲害係部分「文宣」提及銀行千方百計堵塞此「財富漏洞」，刺激了熱衷聽信網上流言族群對探究陰謀論的喜好，每日睇多幾次「譚校長」，最終就忍不住落疊。

所謂亂世出騙徒，經濟衰退來襲加上低息環境延續滋長騙案，年長一輩要抵禦網上似是而非投資機會難度確實越來越大，大家呢排記得要睇住身邊的譚詠麟粉絲，以免他們因為「心好亂」而被騙徒再有機可乘了。

===============

精選資訊網站「中環街市」 臉書粉絲頁