雅虎香港財經 嘈老闆IG｜交椅洲填海成本可收購三大地產商｜曹參國
成個中環都講緊AT1債係乜東東，個個都好似如夢初醒，而家先至緊張自己公司啲錢放嘅銀行究竟有冇買咗AT1債，連自己公司有冇直接同間接持有AT1債，好多CEO都仲係懵吓懵吓。而家香港政府諮詢緊喺交椅洲填海，淨係填海都使咗5,800億元，睇唔住條數嘅話隨時真係會變咗納稅人嘅債務。
AT1債又叫做CoCo債，聽個名真係冇乜殺傷力，但其實係美國政府帶頭喺金融海嘯之後，要求銀行自己發行嘅特別債券，即係銀行有一日執笠一蚊都唔會賠，咁啲利息就自然會高返少少，好多人聽到係銀行發嘅債券就瞌埋眼買咗，點知而家瑞信發行嘅AT1債就變晒牆紙。有時政府計嘅數真係唔好瞌埋眼就當冇嘢，因為喺某年某月之後我哋係要還嘅。
好似交椅洲填海，我曹老闆就最反對啲所謂環保人士提出嘅理據，乜嘢水位上升，唔通真係會有電影（明日之後）咁嘅情節咩？呢種完全盲目反對發展嘅思維，就係阻住香港向前行嘅阻力。不過我就對於交椅洲填海係咪可以收回成本，都聽到唔少中環人好感慨，因為個個喺甲級寫字樓嘅左鄰右里都搬走咗，空置率超過一成，今時今日香港面對嘅政治經濟環境，係咪真係咁容易搞第三個市中心出嚟？
上個禮拜老友就約咗喺中國會飯局，喺中環想舒舒服服開飯有個房間唔去中國會都真係冇乜第二個選擇，食物出品有水準，四周圍都係充滿中國氣息嘅藝術品。好似簡簡單單嘅叉燒就真係入口即溶，仲有竹笙同蝦球清淡得來又有鮮味，連個紅豆沙都有陳皮甘香。今時今日喺中環仲食到呢啲靚嘢，喺第二個市中心九龍東就諗都唔使諗，交椅州話要做第三個市中心真係唔知幾時先至會有呢啲配套。
AT1債個黑洞今時今日仲未計得到，交椅洲條數睇嚟就好難講得通透，大編輯喺報紙就計咗條數出嚟最多賣地收到2,700億元。5,800億元填海成本，差唔多等於可以一口氣收購晒長實（1113）、恒基（012）同新鴻基（016），三間地產商而家市值夾埋都不過係6,200億元。呢個洞係咪填得過就真係要諗清諗楚。
曹參國
註：專欄作家言論不代表本網立場
