雅虎香港財經 嘈老闆IG｜做大餅要靠起勢「炒」｜曹參國
麥當勞呢排個廣告，爆紅晒網絡世界。麥記喺報紙賣咗全版廣告，又大推社交媒體，大字標題「麥當勞咖啡宣佈退休……今晚6點正式道別」，立即引起全城關心，網民紛紛喺各大社交媒體留言，有人話唔捨得。喺google搜尋「麥當勞咖啡」霸佔榜首，即刻有網民話要「炒」麥記咖啡杯。麥記其後再登廣告話咖啡只係暫停供應12小時，以便全面升級。真相係點冇人知，但係談論嘅熱度就可以話贏番晒成個「勢」。
一般做廣告或市場推廣嘅人士均會明白，每樣產品嘅成功關鍵係是否懂得「炒」起個勢，無論係產品、樓盤，定係整體經濟，定位要凸顯，成為全城熱話，市場需求就會「被製造」出嚟，賺錢機會就出現。香港嘅官員想搞夜市，第一樣要學嘅就係點樣「炒」起個市。
其實香港人一直最擅長造勢「炒」起氣氛，有得「炒」即意味有商機，就以賣樓為例，只要發展商開售樓盤時成功「煲起個盤」，吸引買家入票，製造搶購氣氛，那樓盤定必可以熱賣，就好似油塘新盤以居屋價開售，食盡今年居屋入紙嘅時機，天時地利人和配合，即時成為市場焦點。仲引領大批客源湧出來，呢個盤逾800伙更賣個滿堂紅，銷售成績為近期淡靜樓市帶來驚喜，同時幫市場注下強心針，極具指標作用。
無論樓市、股市、任何產品，只要做起個勢，交投暢旺，就可水漲船高，對整體經濟發展甚為有利。好似最近中環講緊股票印花稅幾時壽終正寢，減少交易成本可以增加流通量，呢個真係冇讀過經濟學嘅人都知道，多咗交易咪就係「炒」旺個市嘅基本技巧。
中港全面通關，社會完全復常，但香港嘅復甦步伐卻唔似如期，香港經濟可能需要一個催化劑，一旦可以「炒」起個勢，經濟引擎便可重新起動。內地政府近期話要激活樓市、股市，招式都不外乎係撤銷啲無謂嘅限制，「炒」起個市，香港政府真係要偷下師。
講起「炒」，一定唔少得為食嘅我曹老闆，喺天后L Hotel地庫嘅中菜，阿翁鮑魚唔止攞過好多年米芝蓮餐廳榮譽，鮑魚以外嘅海參鵝掌都做到火喉適中，炸子雞仲能夠有淡淡香味，伯爵湯就材料十足，做粵菜都真係要先識得「炒」。
曹參國
註：專欄作家言論不代表本網立場
