【基金論勢】新股賺茶錢難暴利（盧志威）

目前的市況，是唔理三七二十一，散戶隻隻都用盡孖展認購，呢種方法除咗利好公司集資之外，對於賺取回報「並不理想」。

相信讀者最關心，是科網股尤如高速過山車，由兩個月前的財富創造機器，突然之間從高位失速下跌，基本上無論大中小，應該都有一成以上的跌幅，正常來講科網股的波幅一定是巨大，升跌10%可謂濕濕碎，筆者覺得不用太擔心。

尤其是大型科網股，由於螞蟻金服正在全速搞上市，冇理由會突然之間崩潰，所以在這大半個月期間，指數及大價股不至於出現大跌，當然中小型股就好難講啦，而喺螞蟻金服上市之後，有機會出現大跌，所以應該小心謹慎。

散戶搏盡 審慎行事

螞蟻金服值唔值得抽，其實要視乎定價，以目前的市場氣氛，一定是予取予求，定一個天價亦都冇問題，對於公司來講，自然有助於抽水，但是對於投資者而言，即使前景亮麗，但是以超高價上市，絕對會限制升幅，同時亦要因應熱門程度，在策略上作出調整，因為新股唔代表必勝，最近上市的百勝中國（9987）就出閘跌腳，表現強差人意，中得越多輸得越甘，頭槌飛要蝕過百萬，就算非常火爆的新股，由於中籤率低，攞唔到大貨，基本上都係賺茶錢，唔會話有暴利，所以呢個遊戲唔係話追熱門就可以贏，關鍵是要尋找好的股票，希望上市之後長升長有。

目前的市況，是唔理三七二十一，散戶隻隻都用盡孖展認購，呢種方法除咗利好公司集資之外，對於賺取回報「並不理想」，所以應該審慎行事。

盧志威

本欄逢周五刊出