【基金論勢】股市調整不會太深(盧志威)
歐洲疫情再度惡化,觸發環球股市再度調整,尤其是歐美股市更從高位急跌,但是筆者認為,目前的治療方案已經比以往大大進步,再加上明年很有機會出現疫苗,股市會先於人類出現抗體,所以調整幅度不會太深。
只不過撞正美國總統大選,難免會杯弓蛇影,其實本來投資者就想縮注,所謂的確診人數上升只不過係藉口,嚇唔散股市。
同埋環球政府已經養成「債多人不怕」的心態,反正都已經債台高築,都唔爭在借多啲,一係就用補就業計劃派錢,一係就在金融市場釋出流動性,都唔會發生今年年初,流動性不足,引發人踩人的慘案,所以視乎跌幅有多深,可以部署分段撈底。
世紀之戰寧靠邊站
另外一樣要留意是升市的結構,嚴重偏執在幾個板塊,來來去去都是互聯網、醫藥、半導體等,而這些板塊走勢脫離大市,跟傳統的地產、消費、石油等,非常缺乏相關性,今次的調整也是從上升幅度較大的公司開始,似乎是一個大型的獲利回吐,所以不用太過擔心。
正如筆者所說,美國總統大選之前必定是買定離手,不去多想,因為雙方為咗拉票,一定會不停製造新聞。據說,今年的投票人數將會達到歷史新高,肯定是一場世紀之戰,都無謂在這段時間踏入市場,寧願等塵埃落定之後再作決定,無論邊個獲勝,對於歷史大局相信都是短期影響,這個星期就靜心觀察吧!
盧志威
本欄逢周五刊出