【報稅2020】收到綠信封即做四件事

遲到唔代表無到，稅局終於把報稅表送到大家手上。今年收到報稅表即使你唔急住填，都應該即時著手做四件事。

舊稅要清

稅局早前公布於今年四月至六月繳交的薪俸稅、個人入息課稅及利得稅，將自動延期三個月，此措施涉及逾100萬名納稅人。按時序計，四月至六月通常係第二期稅款，由於銀碼較為細又自動延期，你可能已經當無件事。

所以第一件事係找出稅單，銀碼唔大就快手清了這筆舊稅。假如你不幸早前加入失業大軍，而第二筆稅款屬於暫繳稅，距離交稅限期又超過28日，則可以嘗試填IR1121表格向稅局申請暫緩繳交暫繳稅。假如你係碰上減薪或要放無薪假令收入減少，亦可以向稅局申請分期繳稅，個人或獨資業務經營者可填IR1360表格，附上分期繳稅建議、過去三個月銀行月結單或存摺副本、過去三個月收支詳情，今年吸引之處係免收附加費。由於申請手續有點煩，如果第二期稅款只係幾千蚊就無謂搞了。

IR56B、IR56F、IR56M

IR56B、IR56F及IR56M唔係乜嘢神祕密碼，IR56B係現職僱主按你薪酬填寫的報稅表副本，假如去年你曾經轉工，則應該會收到前僱主發出的IR56F副本。假如你工餘時間有「炒散」接Job，亦應該會收到「炒散」僱主發出的IR56M副本。通常較多麻煩就係IR56F及IR56M，特別係一些管理較混亂的蚊型公司，會計部員工不時換人，就可能忽略向你發出副本。遇到這類情況最好都係主動追一追，總好過自己靠估報數。

開「稅務易」戶口

平日工作用電腦多過用筆，久而久之唔少人都有用筆填form恐懼症，同一張form用電腦填就會得心應手得多，假如你都係其中一份子，用筆填報稅表無疑係年度一大挑戰。

要告別此煩惱就要開一個「稅務易」戶口，到政府一站通網站揀「申請『稅務易』通行密碼」，填寫身分證號碼及報稅表上的稅務編號，登記後就會收到啟動密碼，按指示登入並更改密碼即可以用電子方式報稅。電子方式報稅除了較易填，尚有兩大優勢，一是僱主申報的收入數字會預填在電子報稅表內，讓你更方便比對；二是用電子方式可延遲一個月報稅，最符合上班族對麻煩事拖得就拖的習慣。

收集慳稅資本

2019/20課稅年度寬減稅額上限2萬元，假如你月入3.1萬元，就可以幾乎盡享寬減額。不過香港月入四萬以上大有人在，要慳稅就要積極收集資本。最好用的慳稅資本係父母免稅額，即使你未有與父母同住，父母年過55歲、你全年付出不少於1.2萬元供養他們，已可享每名父母免稅額2.5萬元。假如你係獨子獨女當然沒有分配父母免稅額問題，不過有兄弟姊妹就要事先協商一下，較公平都係按大家的揹稅負擔作分配條件。

除了父母免稅額，個人進修開支、強積金供款、供樓利息還有自願醫保，都係上班族較容易忽略的扣除項目。雖然這些項目慳稅銀碼較濕碎，不過加起來可能剛好令你稅款歸零，而只需要應付暫繳稅，收到稅單心情都會好一些。