外國疫下高危活動清單
新一波疫情來襲,快將舉行的書展「安全系數」再次成為大家關注點。美國德州醫學協會本月初發布高免活動清單,從安全分級睇,書展原來未算牙煙。
這張清單列出37項日常活動,再按安全度分一至九級,一係最安全而九係最高危。一級安全活動包括去露營,本地露營友就講笑話因為美國地方真係大,換轉係香港,熱門露營地區營貼營,晚上人山人海開餐,安全系數至少加七級。
兩項我哋覺得唔太安全的活動:去圖書館、在鬧市逛街,原來都只係第四級活動。估計都可能係外國圖書館「人口密度」無咁高,而在鬧市只係在街上行走,又應該較坐響公共交通工具、餐廳一段時間安全。至於我哋經常做的「Shopping at a mall」屬於第五級,安全度為中等。照咁睇書展係「Shopping at a hall」,安全度應大同小異。不過要留意書展人流遠遠拋離假日旺區商場,大家購物時又少不免會揭下書本,所以切記帶搓手液並密密清潔雙手,最好加快逛書展效率,先可以平衡一下行書展風險。
咁有乜嘢活動屬於第九級?原來食自助餐、做Gym、去主題公園玩、睇戲、聽演唱會、去酒吧都屬於頂級高危活動。參考近日中招個案,主題公園、自助餐又真係牙煙,再加埋戲院高危,睇怕想低吸迪士尼股票都可能要再忍忍手,而接任海洋公園主席的劉公子亦應該有排煩。
另一個本地最頭痕嘅執董肯定係郭基煇(下圖),集團新酒店沙田帝逸乃現時香港最難預訂的酒店自助餐,連午餐booking都要近半個月,會費1288都大把港人照付,酒店正進入上升軌道,豈料本港再爆疫情,睇怕都要再度新計。至於新一波疫情另一爆發點餐廳堂食就被列為第七級,近日餐飲股再大跌,證明投資者相當清醒。
打工仔應該最關心的在office工作安全系數,原來做夠一星期都只係排第六。不過又係嗰句,外國office地方普遍大好多,加上有唔少打工仔仲繼續在家工作,office要坐得疏就唔難,反觀香港中小企,有時檯貼檯情況拍得住餐廳,要自保唯有罩不離口,難怪有轉型做口罩的細價股今日爆升,皆因口罩都會繼續成為各家庭的生活必需品了。
===============
精選資訊網站「中環街市」 臉書粉絲頁