外國研究:放工諗返工 會對家人造成傷害
打工仔女平時要OT已經夠慘,若然被老細逼迫,無奈要把工作帶回家,更係雪上加霜。唔夠休息令人變得憔悴外,有外國研究指,無咗放工概念嘅人,更易引起家庭紛爭。
Virginia Tech University嘅William Becker教授一項研究發現,就算實際上無花時間喺屋企OT工作,打工仔女認為可能有需要咁做,呢種想法仍會對自己和家人造成傷害。
事實上,靈魂被電子科技綑綁於辦公室,係全世界打工仔都要面對嘅問題。研究指出,打工仔女一直維持「準開工mode」嘅精神狀態,會令佢哋變得焦慮,容易和伴侶或家人發生爭執。
此外,明明無帶工作返屋企,但參與家庭活動時,打工仔女亦會被「準開工mode」纏繞,從而分散咗佢哋嘅注意力,令其無法投入家庭樂之中。
Becker教授指出,「彈性工作時間」往往會變成「無界限工作」,進一步損害打工仔女嘅身心健康。佢提議僱主應明確設立放工後嘅工作時限,等員工可以「真」放工,不過真心問,有幾多位老細肯咁做啊?
所以話,放咗工就應該將工作拋諸腦後,把集中力放回家庭。唔想家變,就要將工作和休息嘅界線好好劃清,要畀老細知道你嘅底線,唔好俾佢得寸進尺啊
來源:HR Dive
===================
19網輕鬆爆料熱線,歡迎舉報老細同事19惡行,立即click入去講畀我哋知啦