外國調查:年輕人感覺被老細誤解
無人鐘意俾人彈三彈四,日前網上學習平台Udemy嘅調查指,有86%嘅Y世代打工仔表示,感覺自己呢一代人被誤解,令佢哋喺職場上嘅風評好差,批評與事實不符。
該調查訪問了逾1000位介乎21歲至37歲嘅美國打工仔。問到職場上佢哋最討厭被冠上什麼負面標籤,有51%回答「懶惰」。另外,俾人話「自我中心」(35%)、「自以為事」(34%)、「神經過敏」(33%)、「未準備好投身實際職場」(33%)和「理想主義」(19%)等,令Y世代好抗拒,但其實標籤背後,好多都係誤解。
調查又指,雖然67%受訪者承認,自己嘅潛力和僱主嘅期望存在差距;但60%人認為「僱主對年輕員工嘅工作技能和經驗,抱有唔合理嘅期望」。
不過,仍有73%受訪打工仔認為要接受更多教育和培訓,才能在事業上取得成功。有46%受訪者會透過網上課程自修,有35%則稱會攻讀另一個學位課程;至於覺得唔需要接受培訓嘅,僅佔14%。
無論年代同環境點變,可以肯定嘅係,神隊友同豬隊友嘅出現,跟年紀未必有太大關係。單單講鬥懶,相信班後生仔女未必鬥得贏公司一眾老seafood,只係前者懶出面,後者懶入心。
睇完調查,講到底,年輕打工仔女想要嘅,只係公司嘅人能夠賞罰分明,做得差抵俾人話,做得好獲讚賞一下,有時候懶就懶,但唔好畀懶人升職囉,當然老細有多啲表示就更好啦。
來源:Ladders
===================
19網輕鬆爆料熱線,歡迎舉報老細同事19惡行,立即click入去講畀我哋知啦