香港股市 已收市

外國調查:逾半打工仔坦言 公司無位食飯

返工咁辛苦,無非為食餐安樂茶飯,可惜現實係殘酷嘅。本港打工仔女多數午飯時間得1個鐘,食得飯來,飲埋杯水,去多轉廁所就夠鐘;有啲更慘,只有230分鐘「啃飯」。

想慳錢慳時間,有人選擇留在公司食Lunch,但一樣食得唔安樂。據英國傢俬店Furniture123一項調查顯示,逾半(56%)受訪打工仔女稱,辦公室無特設位置俾人食Lunch,其實都幾唔人道。

該調查訪問了1012位英國打工仔女,當問到希望辦公室添置乜嘢設施時,最多人回答「午餐專用區」(76%),其次是沙發(70%)、豆袋(62%)、花園或露台(59%),以及乒乓球枱(52%)。

事實上,有34%受訪者稱喺辦公枱上食飯,等於無離開過;當中更有69%嘅人表示,因為午飯時間無離開過工作範圍稍作休息,令到自己嘅生產力降低。老實講,要對住一堆文件開飯,食龍肉都無味啦,仲點會有心機做嘢。

另有47%嘅人指,若午飯時間可以真正放足1個鐘,下晝嘅工作效率會更高。奈何對打工仔女來講,想舒舒服服食餐飯,放鬆一下,卻係咁艱難。

另一方面,有46%受訪者表示,希望喺午飯時間離開辦公室,到外面散步,但當中有47%覺得無地方好去;亦有33%嘅人坦言,除了辦公枱範圍,便無其他地方可以俾自己休息。

辦公室其實古今中外,同血汗工場無乜分別,老細快啲諗諗計,好啲對待員工﹗

來源:employee benefits

===================

19網輕鬆爆料熱線,歡迎舉報老細同事19惡行,立即click入去講畀我哋知啦