外國調查:逾半打工仔 對同事放假感到壓力
個個打工仔女都恨放大假,卻未必想身邊同事攞假,因為擔心要做埋佢嗰份。有外國調查指出,逾半(53%)受訪打工仔女表示,覺得頂替放假同事嘅工作係「相當有壓力嘅事」,你同意嗎?。
美國一間提供遠程醫療服務嘅公司Nugg,對2000位美國打工仔女進行調查訪問,發現公司若然有一位同事放假,其他員工嘅平均工作量,將會增加約三分之一。有37%嘅人更坦言,曾因要替放大假同事嘅工作善後,而對佢感到不滿。
事實上,早前已經有職場網站調查指,有67%受訪打工仔女稱,就算同事正在度假,如有相關工作問題,仍會聯絡對方去處理。
雖然要頂埋放假同事嘅工作,的確辛苦好多,但自己也有放大假嘅時候,講到底只係互相幫忙而已。唔想自己一放假,就被同事仇視,最好預先將手頭上工作辦好,並將當中易出問題嘅細節,向信任嘅同事交帶清楚。自己放假既放得安心,又唔使同事幫你執手尾咁頭痕。
來源:Moneyish
===================
19網輕鬆爆料熱線,歡迎舉報老細同事19惡行,立即click入去講畀我哋知啦