【外國HR調查】22%年輕打工仔曾被降職

 

升職本來係高興事，但遇到縮骨老細，只升你Title，人工卻依舊，仲要「皇恩浩蕩」，升都一肚氣。不過，更慘嘅係升職無耐再「被降職」，嗰種挫敗感，任何人都會覺得好hurt。

據人力資源公司Office Team嘅調查顯示，14%受訪打工仔聲稱試過「被降職」，尤以18歲至34歲組別嘅年輕人比佔最大，有22%表示曾被降職。

該調查訪問了300名HR主管，以及超過1000名美國打工仔女。事實上，有46%受訪HR主管坦言，公司曾有員工被降職，又指年輕員工被降職嘅主要導火線係「表現欠佳」（39%），其次係「升職無耐發現佢做唔來」（38%），以及「公司架構重整／職位刪除」（16%），而「自願降職」僅得6%。

調查又發現，擁有1000名員工或以上公司嘅HR主管之中，就有91%話見過同事被降職；諷刺嘅係，有97%指出，公司唔會對55歲或以上嘅員工「開刀」，即係話只要捱過50歲大關，與其搞你，不如等你自己退休算數。

話說回頭，調查又指，試過被降職嘅受訪者當中，有52%選擇辭職唔做，而18歲至34歲嘅年輕人反應最激，當中有64%揀離職。相反，55歲或以上嘅打工仔女，則無人諗過要離開公司，畢竟等退休可以灑脫啲、唔太計較。

此外，有一半受訪者表示「盡可能表現得體地接受結果」，而47%坦言「感到難過和對工作失去興趣」；另有41%稱會「在新崗位表現優秀嘅自己」，正能量爆燈。

話時話，若然被降職嘅係你，大家又會點做呢？你會唔會立即衝入老細房，勇武抗爭？

來源：Ladders

===================

19網輕鬆爆料熱線，歡迎舉報老細同事19惡行，立即click入去講畀我哋知啦

【相關搜尋】懷孕被降職有否犯法?