大生馬氏「富三代」 中環賣珍珠奶茶：日賣500杯就回本

香港近年再捲起珍珠奶茶熱潮，這種手搖飲品店如黃河氾濫，一發不開收拾。今次新加入戰場的主角－大生銀行、大生地產（089）馬氏家族第三代後人馬桂汶（Dennis），本身是數間餐廳的股東，今次踩入珍奶界，從台灣引入有「黑人」陳建州做股東的「春陽茶事」，在中環插旗；飲品店看似逢開一間賺一間，Dennis不諱言，只要茶調得好飲，便是一門高利潤的生意，他深信有麝自然香，對某同行以排隊方式飢餓營銷吸客嗤之以鼻：「點解要令到啲消費者咁辛苦，排兩三個鐘去飲一杯嘢？」

Dennis身為大生銀行家族的「富三代」，無加入家族的銀行或地產公司，選擇在Marketing界打滾十數年，「爸爸同我講，需要啲乜，係要靠自己earn返嚟。坦白講首筆資金係要靠屋企，但之後賺到嘅再開就係自己嘅錢。」他對飲食業情有獨鍾，跟朋友合資創業，開過西餐廳，他指着自己肚腩笑言：「你睇我身形就知我鍾意食嘢啦！」

即使市面有海量的珍珠奶茶店，他仍然自信爆燈，投資400萬引入有台灣群星拱照的春陽茶事：「大家都覺得珍珠奶茶店太過氾濫，但無論有幾多間，其實計數計得好，手搖飲品係成本低，利潤高嘅生意。」他又認為飲品店在經營者角度看，較開餐廳更容易，因為飲品可以跟配方去沖：「餐廳個命運係擺落廚師嗰度，某程度上你要受個廚師氣，佢劈炮唔撈，你就麻煩啦，但飲品只要照住formula，將同事訓練得好就夠。」

首間分店選擇在中環，他指無論租高有多昂貴，每日只要500杯便可回本，若以此計算，每日開店10小時，即每小時要賣50杯，幾乎每分鐘便要沖一杯飲品，何況要賺錢，每日過千杯是「基本要求」，Dennis認為最快可以半分鐘沖到一杯：「前期預備得好，煮定黑糖，其實某啲飲品只係倒啲珍珠落去，一次過幾杯都得，其實講到尾，生意都係一個計數遊戲啫！」目前開店難題，便是如何訓練90後員工，因為前期招聘人手已有逾一半人「甩底」，「見完工話請，返日嗰日都可以消失。」

香港數得出的珍珠奶茶店逾80個，近年中國最紅的「喜茶」已攻港，並開了兩間分店，輸在起跑線的新丁，春陽茶事如何突圍？Dennis認為可靠品牌效應及台灣原材料作賣點：「台灣股東背後有黑人嗰啲，前期宣傳已經慳咗一筆，同埋茶葉、黑糖，甚至檸檬都係台灣入口，相信香港人都係識飲識食嘅，所以點解要令消費者排隊3個鐘去買一杯嘢飲。」

他又想出以贊助宣傳品牌，例如將首日收益，捐給慈善基金，另外走名人路線，店舖正式開張首日，靠黑人等明星撐，到明星演唱會又贊助飲品等等。他目標一年內開到10間店，除了自營店亦有加盟商，計劃非常進取，他認為珍奶茶熱潮或會冷卻，但芝士奶蓋類飲品因變化較多，有信心能持續經營。

記者：陳新政

影片：
採訪：陳新政、朱得志
編撰：朱得志
攝影：馮峰、卓振輝
剪接、後期：馮燊明
編導：馮燊明
編審：倪敏慧