雅虎香港財經 大茶飯│以為自己識波 可能輸更多（青冰）
世界盃開鑼幾天，已頻頻爆出冷門，而所謂的熱門，除了少數球隊如英格蘭及法國，大部分表現也差強人意，不過就如睇公司出業績一樣，很多時候遜預期只是一個reality check，可能是之前估得太高，更大機會是市場（球迷）以為對公司（球隊）很了解，只是結果不似預期而已。
美股外幣即時報價 多國新聞任睇
雖然青冰是一個標準球迷，但隨着年齡增長，及要為家庭（尤其是子女）付出更多的時間，近年的睇波只會集中在英超，而且凌晨波唔會睇，不過仍很積極留意球壇消息，用專業的角度看，這位球迷已是虛有其表了。睇波作為娛樂，對這位球迷是沒問題的，但真係要落場投注，就有很大問題，而最弊的就是，「以為自己識波，可能輸更多」，這個放諸股壇也是一樣，輸大鑊的股票，多數都會是自己以為最熟識的，很深入了解的股份，咁先會大大注，睇錯都唔會識得走囉。
弱隊以逸待勞 有意外收穫
四年一度的世界盃，對較熟悉的球員及球隊，總會看高一線，在行為金融學中，好像也有類似的論述，是一個bias。舉過簡單的例子，打開阿根廷、德國及比利時的大軍名單，或者開賽前的出賽陣容，點都覺得是高一班波啦，以青冰為例，每隊正選起碼識七至八個，亦深知他們的實力，所以很自然會覺得場波係強弱懸殊，大佬呀，對面真係一個都唔識啊。對球員熟悉，因為睇咗好多年了，這裡也隱含了兩個意義，知名球員已一把年紀，真係睇住佢成名，另外，亦是因為他們身在頂級聯賽，睇英超或歐聯時總會睇到，在高水平比賽，本是好事，但別忘記了今次世界盃，破天荒在冬季舉行，而各頂級聯賽為了讓路，又要踢歐聯，所以賽程極緊密，三日一賽是閒事，世界盃開鑼前一星期才歸隊集訓。不少知名球員都在11月初時有小傷患，結果緣盡世界盃，世界足球先生得主賓斯馬，更在法國隊開始集訓時受傷，令人惋惜。
熱門球隊的球員又疲又傷，面對牌面稍次的對手，以逸待勞，有更多時間作針對部署，同你比質素鬥技術應該就輸晒，但谷盡嚟踢一場半場好波，隨時會有意外收獲，相信日本、沙地及加拿大，就是最好的例子。要落注，自然就要看值博率，經過沙地及日本的勝仗，相信熱門球隊會踢得更小心，投注者亦不會一窩蜂all in熱門隊，賠率相對變得合理，在分組賽第二輪，熱門隊在出局邊緣，點都會跑多兩步做逼搶，力爭最後出線席位，且看會否跟第一輪來一個大反轉，大部分是熱門隊勝出。
青冰
http://www.fb.com/chingbing888
本欄逢周五刊出
