大茶飯｜碧桂園服務盡用子彈做併購（青冰）

碧桂園服務今年併購多，私有化藍光嘉寶後，最新又買入富力地產老細的物管公司。 (Zhanna Hapanovich via Getty Images)

青冰將碧桂園服務（6098）放入目標範圍，已經超過一個月，但遲遲都未敢出手，其一是怯於近月內房超級弱勢，作為相關股的物管難免受拖累，無謂太早逆勢做，另外就是早前有傳恒大（3333）將出售手上最有價值的恒大物業（6666），碧桂園服務是其中一個潛在買家，如果成事肯定會解恒大燃眉之急，但對碧桂園服務未必有着數，萬一最後要接order硬食恒大物業，個價都唔慌會平，但今星期出手買富良環球（即富力地產（2777）老細的物管公司），相對更加優質，所以係時候作部署。

下載Yahoo財經APP

美股、外匯、加密貨幣免費即時報價，自選投資組合獲取相關新聞提示。

風波過後 肯定最先反彈

碧桂園服務作為物管龍頭，估值從來也是全行最貴，今年動作多多，3月時全購藍光嘉寶並作私有化，5月恒指宣佈納入為成份股，幾日後便發新股集資105億元，每股作價75.25元，其全資附屬公司再發可換股債券，又抽水50億元，正式染藍後在6月尾創歷史高位85.2元，自此就進入大跌浪，7月股價急跌時曾經出通告話會回購，結果等到8月業績後共出手七次，斥6億元回購了1,020萬股，自9月3日回購後已經停手無再買，其後股價一洩如注，9月累跌兩成，現時回看管理層批股的timing，真係準到得人驚。

今年前後抽水約150億元，私有化藍光嘉寶用了65億元，仍然子彈充足，難怪傳過是恒大物業的準買家，最後因價錢而傾唔成，塞翁失馬焉知非福，恒大物業主要在三四線城市，而富良環球就在一線，100億人仔買落去，點都好過硬食恒大物業，而且今次曲線救助富力，日後這個人情可能幾值錢，再者今年集資所得已經耗盡，阿爺再要搵人認頭恒大物業時，大可話自己莫水了，搵另一位勇士啦。

現時市盈率大概30倍，應該是近年最低估值，如果內房危機仲要再拖幾個月，物管仍難有運行，但只要挨得過呢波，作為龍頭的自然會率先反彈，科技股災後大家會買騰訊（700），美股股災大家會撈FAAMG，就睇吓日後的碧桂園服務，能否再闖高峰。

青冰

http://www.fb.com/chingbing888

本欄逢周五刊出