【大茶飯】如何避開配股地雷（青冰）

不幸踩中配股地雷，難免會有損傷。

上周有唔少上市一、兩年的股份配股，而這些都是知名的公司，當中唔少係策略股東套現，例如凱雷悉售閱文（772），綠地減持雅生活（3319）股權，而更多的是，只見大手上板而不見通告，只能從市場消息及斷估，得知係機構投資者減持，例如錦欣（1951）、同程藝龍（780）及微盟（2013）。

若果將1月配股、新股集資及內房發債的金額加起來，肯定過千億，但無損新經濟股的壯旺，龍頭股屢創新高後，升勢逐漸蔓延至二線的科網股，例如近月較沉靜的軟件股，金山軟件（3888）、金蝶（268）及中軟（354）都非常靚仔地破位，夾硬要搵個理由解釋，可能是跟內地炒軟件股，不過青冰比較信服的還是，板塊輪流炒而已。

半新股要睇招股書

市旺輪流炒，但又驚扑中隻會配股的，該如何是好呢？這個趨吉避凶的方法可能幫到你，若果手上的股是新經濟股類別，而又是近一、兩年上市的，那就沒辦法了，食得咸魚抵得渴，有爆升的歡樂，策略股東亦有更大的誘因高位套現，同你分享歡樂，所以青冰的策略是，買龍頭股，如果是二線的科網股份，可選金山、金蝶及中軟這些，上市日子已久，業務穩定，留下來的策略股東應較長線，而最重要的是，這些股距歷史高位仍遠，要驚都未係時候啦。

而上市剛過半年的半新股，禁售期剛過，更加要打醒十二分精神，較務實的方法是開個招股書睇吓，如果策略股東係基金性質，同公司並無深厚淵源，套現脫身係正常不過，由於佢哋是上市前入股，成本價可能低到你唔信，所以即使該股上市後無甚表現甚至穿底，現價掟出去仍然係啖啖肉，而成本價在招股書都有披露嘅，只在乎戰友們會否多走一步，做功課趨吉避凶。

本欄下次見面係農曆新年後喇，在此先預祝各戰友心想事成，身體健康，鼠年再見！

青冰

http://www.fb.com/chingbing888

本欄逢周二刊出