大茶飯│昨日的XIV 今天的GME？（青冰）

美國證監會都開口話要密切監測GME事件，究竟幾時同點樣收科，或牽動著全球股市在2的走勢。

相信在一個月前，大部分人都唔知美股有間公司叫GameStop（GME），但經過最近兩星期的密集性曝光，應該唔會有人唔知佢乜事喇，散戶打大鱷之役，即使無參與其中，都感受到花生味爆標，隨着上星期個別券商搬龍門，短暫停止相關股份及期權買賣，所牽涉的政治及金融問題愈來愈大，美國證監會都開口話要密切監測，究竟幾時同點樣收科，或牽動著全球股市在2的走勢。

在2018年2月，美股出現了XIV事件，出事前唔太多人知道，這個XIV其實係

XIV爆煲 標指數日跌一成

人稱恐慌指數VIX的反向ETF，簡而言之，當你持有XIV，標普指數的波幅愈跌，你就愈賺錢。由於當時美股經過幾年長牛，大部分人都習慣了升市及波幅向下，致XIV相當受歡迎，但就在2018年2月初，聯儲局暗示加息步伐會加快，美股急挫，而在2月5日，恐慌指數VIX突然急升一倍，XIV相關工具齊爆破，XIV資產一日間由19億美元跌至6,300萬美元，恐慌氣氛迅速散播，加上基金要沽大市值股份填XIV個氹，標普指數在幾日間累跌一成。

今次GME事件，亦令某些對沖基金爆煲，執筆之時有報導指Melvin基金因GME交易而令1月損失5成，如果這是冰山一角，一件花生小事，隨時會引發基金們沽售其他股填氹，情況有如3年前的XIV。不過，睇返2018年2月美股的急挫，都係嚟得快走得快，標普用咗個零月就收復失地，從積極的角度看，閃崩係入貨的好時機，但首要是你仲有充足子彈加上倉位貨唔多，否則恐慌來襲時，怕你有錢都未必敢買。

2018年1月的港股，慢牛忽然變瘋牛，禾雀亂飛，幾乎是敢衝便會贏，不過XIV事件令全球股市急挫，港股的強勢亦因此告終，上文說美股一個月就回復正常，但港股就係2月爆煲，恒指由33000點起跌足八個月，累跌逾兩成半，一件看似唔關港股事的事，成為了最後一根稻草。

上月港股大牛，又係敢衝便會贏，當然亦要拜北水狂買所賜，隨着昔日的名家衝出嚟話騰訊（700）睇一千，街頭巷尾年青人都講股票，適當的調整倉位，提高警覺並且戰且走，將會是青冰2月的應市策略。

青冰

http://www.fb.com/chingbing888

本欄逢周二刊出

【下載Yahoo財經APP】獲全球超過1700萬人信任的美股投資工具，跨平台同步你的投資組合，一APP掌握TSLA、AAPL、AMZN等美股最新走勢。