【大茶飯】港股愈跌 北水愈買（青冰）

北水假期由今日（周二）開始，直至下周三才重開。

北水假期由今日（周二）開始，直至下周三才重開，因北水喪買而今月超強勢的股份，如中國飛鶴（6186）、平安好醫生（1833）及愛康醫療（1789），會否因主力買家休息而轉弱呢，看未來幾個交易日的走勢便知，有心入場和早前落錯車的戰友，或許是一個機會。

很久沒寫過港股通的數據，趁今篇稍作回顧吧。去年經上海及深圳南下買貨的北水，分別錄得1,495億及998億元的淨流入，合共是2,493億元，而買盤都集中在下半年。去年反修例事件引發的動盪，屢傳中央會加強對香港經濟的掌控，咁買股票增加自己在股市的話語權又算唔算呢？下半年淨流入達1,780億元，單是12月單月更有413億，究竟係港股估值平吸引內地資金，還是上述原因，可自行解讀。

掃騰訊建行 助港股靠穩

如果你覺得去年北水係瘋狂買，今年的數據真係唔知點形容了，按港交所首三個月的數字，北水淨流入2,283億元，4月未有最終數字，但青冰手動計過數，截至上周五，雖然4月交易日較少，但已有186億元淨流入，換言之今年累計已有2,469億元。撇除滙控（005），今年港股表現唔太失禮，尤其是3月的股災月，明顯比美股好，美股升得多插得深固然是原因，但北水上月狂買港股，尤其主力買騰訊（700）及建行（939），相信都是港股靠穩的功臣。

內地經濟唔掂，由去年貿易戰開始，至今年的新冠肺炎，理應是雪上加霜，國內經濟數據，無論是GDP及PMI等數字，尤其在疫情後公佈的，都甚有假味，不過戰友再睇吓滬深股通的數據，會令你更加想不通。

去年是A股入摩指入富時之年，錄得淨流入都好正常，去年「外資」淨買入3,517億人仔，以月份計只有4月及5月見紅，5月那次青冰有很深刻印象，係侵侵忽然強硬要大加關稅，單月淨流出536億元。今年新冠肺炎在1月開始爆發，武漢封城，但竟然都無損外資的信心，首兩月錄得499億元淨流入，但當肺炎擴散至歐美，加上油價急瀉引發的全球股災，上月淨流出達678億元，一個月嘔凸晒，都正常嘅，全球risk off，乜都沽啦。不過「外資」可能較善忘，截至上周五，今月又變返淨流入，達482億元，雖然未補返晒上月的流出，但暫時而言，流出仍未成為趨勢。

究竟「外資」是傻的，還是比我們看得更遠，實在搵唔到適合的解釋，但真金白銀的數據，無論是南向還是北向，都值得尊重。

青冰

http://www.fb.com/chingbing888

本欄逢周二刊出