香港股市 將收市,收市時間:5 小時 34 分鐘

【大茶飯】疫境自強靠個仔(青冰)

母公司等錢使,作為阿仔的子公司,維持派息合情合理。

滙控(005)取消及暫停派息之事引起全城熱話,無限花生,不過青冰認為既成事實,作為投資者不如向前看啦,上周在報章專欄提到恒生(011)慘被沽售,似乎係市場殺錯良民,資金冷靜下來後連升幾日,而中銀香港(2388)似乎亦受惠大象倒下,幾日累升一成。

中行派息 六成資金來至中銀

其實道理很簡單,滙豐缺水,作為阿仔的恒生真係要生生性性,向阿媽泵水而維持派息,係理所當然。中銀香港亦有類似的情況,中行(3988)持有66%,在2019年度已可收取107億股息,最有趣嘅係,中行早兩星期宣佈派息0.191人仔,折合大概0.21港元啦,以H股發行量836億股計,中行共派176億港元予H股股東,靠阿仔已經夠畀六成,你話爽唔爽。

市場對舊經濟的中資股甚為抗拒,無他嘅,增長力欠奉,只係靠息率吸引,不過藍籌內三大弱勢板塊,內銀、油股及電訊股,在上周滙豐取消派息事件後,反而令資金垂青,油股就因油價急升而起,電訊股就真係應該因息而起了,你睇中移動(941),業績唔算好,去年一直暗示會因發展5G而減派息,結果末期息仲維持到喎,業績後累升28%,問你怕未。而這些板塊,都有一個缺水的阿媽,所以有能力的仔女們,一定盡派。

本地地產股及收租股現時都算高息,但戰友們都知啦,因為股價跌咗好多啫,加上租金收入大減已成趨勢,減派息絕對唔奇。港鐵(066)是半隻地產股,不過上周都有跟恒生、中銀及電訊股升,或者都係同一個道理吧,阿媽等錢使,別忘記,大股東是香港政府啊,2019年度袋咗57億股息,已經是五分之一的甚麼抗疫基金了。領展(823)過去幾年是神話,現在面對嚴重疫情,又冇一個阿媽需要照顧,留個錢傍身都係正常,還記得12月開始大手回購,由79蚊開始買,到3月6日最後一次出手係73.6元,之後跌得更慘,反而無再出手,現時進入3月年結後等成績表的階段,因息而來的戰友,不妨耐心等業績,再作打算吧。

青冰

fb個人專頁 http://www.fb.com/chingbing888

本欄逢周二刊出