【大茶飯】認識自己有助操盤(青冰)
過去這個周末,青冰花了很多時間在一些跟投資沒相關的事,首先就是研究新iphone及5G plan,貴為機王,實在有太多資訊可睇,其實睇幾個都已夠料落決定,反而係個5G plan,實在令青冰費煞思量,數據量大的好似抵喎,但其實咁大又未必用得晒,跟住有朋友又加把嘴,份約兩年幾喎,可能日後5G普及,你會嫌唔夠用添,聽落也似有道理。
另一個頗花時間的事,就是青冰決定join一個主題公園做會員,這個原來比5G plan更煩更頭痛,不同的卡有不同的優惠,成本相差都幾遠呀(一家幾口嘛),而某些優惠又會在某些大時大節不適用,但青冰就係想大時大節入去住嘛,咁來來回回的去看條款,感覺就好似平時青冰刨通告及睇上市條例咁樣,如果唔用心睇細節,真係好易中伏,用中伏二字可能又太誇張,應該話會唔小心購買咗其實不太適合自己的東西。
攻強避弱添勝算
十月的縮影就是這樣,無形中跟市場的距離拉遠了,現在回看,的確係走甩了甚麼石油、內銀及電訊股,但過去年幾,總會有這些日子,早期都有試過跟一浸舊經濟股,但效果不佳,久而久之就索性唔理了,要了解自己操盤的長短處,好明顯這些股都不是青冰杯茶,唔適合自己的,就乾脆不買,慳返啲精神。
對一般投資者而言,要充分理解某隻股,未必容易,要睇業績、圖表、行業景氣及相關新聞,很多時候都係一知半解就衝入場,但要了解自己投資的長短處,相對上較容易。有些戰友很喜歡撈底,以為平貨就會低風險,可惜唔夠了解自己的習慣,諗住博反彈一成就走,點知輸兩成仲坐住;又有些戰友,平時工作繁忙,每日只會睇報價機幾次,但就跟人玩牛熊或股仔,順風順水時睇少啲其實更好,但遇着逆轉的市況,又是否有時間駕馭得來呢。
要在股市裡長期作戰而搵到食,靠的還是自己,要多做功課,更須了解自己在操盤上的長短處,說趨吉避凶好似太迷信,但強項做多幾次,少沾手弱項,最終會公平地反映在你的戰績上。
青冰
http://www.fb.com/chingbing888
本欄逢周二刊出