雅虎香港財經 太唔是何｜英國做義工初體驗｜400歲人瑞
上次有網友私訊，想400歲人瑞講多啲自己嘅生活，好啦呢次就講下人瑞去報名做義工嘅一啲體驗。以下講嘅係上義工培訓班嘅見聞，因為仲未開始實戰，到實戰後再同大家分享實戰見聞。
點解人瑞會走咗去報名做義工呢？等人瑞先進入「香港小姐模式」：想接觸多啲呢度嘅人、累積多啲本地生活經驗、擴闊社交圈子，同埋貢獻社會（信不信由你）。
適逢屋企附近有間美術館大鑼大鼓話聘請義工，咁方便，於是人瑞就膽粗粗去試下報名。
幾日後就收到美術館職員電話，問咗我幾條問題（懶係有少少電話面試咁），然後就叫我幾個禮拜後去上一個培訓班（當然係免費）。
入到課室，全班大概有廿幾人，目測計埋人瑞自己只有兩名男性，同埋應該只有兩位參加者係比人瑞年輕，大部分參加者都係長者。廿幾人當中，目測計埋人瑞有五位移英港人，有三個係本來互相認識。
培訓班歷時五粒鐘，中間有一個鐘嘅午飯時間，美術館提供了簡單小食同飲品（你知一般英國人啲午餐有幾簡單㗎啦），培訓班又有疊筆記俾咗好多關於個美術館嘅資料俾你睇，當然一路上堂一路講解啦。導師都好有心機講，大家都好有耐性聽。
培訓班仲包括兩個導賞團，第一個就係同俾一般遊覽人士入場觀賞嘅導賞團一樣，帶你行唔同嘅展館，講下啲特別嘅展品等等。第二個就得意啲，佢哋叫「幕後導賞團」，帶大家行下美術館嘅員工通道、辦公室、員工休息室、倉庫、地下室、走火通道等等。
培訓班坐喺人瑞兩旁嘅「同學仔」係兩位睇嚟都好有人生經驗嘅女士，佢哋都話自己做過好多唔同博物館同美術館嘅義工，聲稱自己都好有經驗（睇得出！睇得出！）。佢哋話人瑞好幸運，第一次做義工已經有個咁完善嘅培訓班，佢哋話佢哋之前做嗰啲義工，準備工夫都做得好馬虎。
除咗導賞團之外，培訓班又會教下大家一啲待人接物小知識。例如你見到有一家大細行埋嚟，你首先就唔好假定嗰兩個成年人一定係爸爸媽媽，佢哋應該都要被視為「家中大人（family adults）」，又或者叫「照顧者（carers）」，等佢哋自我介紹自己嘅關係先，才可以確定佢哋係咪爸爸媽媽同埋子女嘅身份關係。
除咗一家大細之外，仲有唔好隨便稱呼遊覽人士為「男士」或「女士」，等佢哋自我介紹咗自己嘅性別才好用確定嘅性別稱呼。
培訓班仲有情景題，我同好有義工經驗嘅女同學抽成一組，問我哋在當值時，如果遇到有遊客想用手觸摸啲好名貴古老嘅展品，應該點做。女同學好有自信咁話：呢啲情況我遇得太多！不要說：「不要碰！（Don’t touch!）」試著說：「請你用你的眼睛、而不是你的手，去欣賞展品。（Please appreciate it with your eyes, not your hands.）」
仲有其他情景都幾得意，例如如果有遊客嬲爆爆咁走埋嚟有嘢要投訴或俾意見，你第一句要同佢講嘅係：「我係義工嚟㗎！」然後再安撫同報告返俾館內職員知（點解要咁做就留待大家自己去揣摩）。
400歲人瑞 —— 40幾歲中年漢被同事嘲笑是400歲人瑞，結果憤而出走鼓起勇氣探索英倫新世界（沒有啦！我和同事關係很好⋯⋯至少我自己是這樣認為）。在重新適應異地生活的過程中，尋找他鄉生活的技巧與生存的態度。從第一身視角分享人性的矛盾、制度的差異、文化的衝擊，真實揭露財富是如何一點一滴積累，以及真人倒錢落海的經驗⋯⋯
本欄〈太唔是何〉逢周五登場，旨在分享筆者在英國日常生活體驗，給各位多一個生活參考，相關分享不存在實用資訊（抱歉！），只反映在當時情況下，筆者遇到的真實情況紀錄，大家可以當係故仔聽，參考一下。
留言、給讚、追蹤、分享，請follow 《太唔是何》Threads或Facebook專頁
