雅虎香港財經 太唔是何｜香港有銀債綠債 英國有政府 Premium Bonds 博贏 £100 萬｜400歲人瑞
之前 400 歲人瑞同大家分享過英國一啲儲蓄戶口嘅種類，除咗免稅嘅 ISA 戶口同埋一般用嚟收息嘅儲蓄戶口之外，如果大家有「抽獎運」，仲可以將資金放喺一種叫 Premium Bonds 嘅工具，保本之餘，仲可以博贏巨獎！今次就同大家介紹 Premium Bonds，同埋同大家傾下，呢隻嘢博唔博得過！
Premium Bonds 顧名思義就係一種債券。佢係由 NS&I 提供，NS&I 全名係 National Savings & Investments（國家儲蓄及投資），係政府嘅儲蓄銀行嚟，所以呢隻債券可以話係 100% 安全。政府喺 1957 年 6 月開始推出 Premium Bonds，話係想鼓勵大家儲蓄喎。
每張 Premium Bonds 價值 £1，要參與抽獎就最少需持有 £25 嘅 Premium Bonds（即 25 張），每人最多則可持有 £50,000。
大家可以透過網站、電話或郵寄方式購買 Premium Bonds；亦可隨時賣出，取回 100% 本金，毋須支付任何費用，所以係「保本」嘅。
不過，呢隻 Premium Bonds 係無息嘅。大家買咗呢隻 Bonds，就會進入每月嘅抽獎環節，每個月都有機會贏得 £25 至 £100 萬不等嘅現金獎。
每 £1 嘅 Premium Bonds 都會有一個獨一無二嘅編號，呢個編號就係要嚟抽獎用，每個編號都係一個中獎機會。NS&I 每月就會隨機抽出中獎編號，送出超過 500 萬份獎金，總價值約 £4.5 億。
獎項包括多份 £25 獎金、£50 獎金、£100 獎金、£500 獎金、£1,000 獎金、£5,000 獎金、£10,000 獎金、£25,000 獎金、£50,000 獎金、£100,000 獎金等獎項，每月仲有兩個分別高達 £100 萬獎金嘅頭獎。獎金愈細嘅獎項，數量愈多；獎金愈大嘅獎項，數量愈少。
從統計角度嚟睇，持有 Premium Bonds 嘅數量愈多，中獎嘅機會就愈大。NS&I 最新公布中獎機會係 21,000 比 1，即係每 21,000 張 Premium Bonds 每月就有一張被抽中獎項（重申係「抽」，唔包㗎！）。
按 NS&I 呢個中獎機會率，可以當你放咗 £21,000 喺度，每個月就會抽中 £25 至 £100 萬獎金不等，每個月都有啲「回報」咁；當然呢個中獎機會連 NS&I 都無寫包單，所以亦有機會抽唔中，抽唔中嗰個月嘅回報就係「零」！
究竟值唔值得擺低少少錢，博佢中鋪大嘅呢？一齊諗下佢有咩優點：資金 100% 安全、所有獎項均免稅毋須申報、每個月都有機會贏高達 £100 萬獎金、隨時可以攞返 100% 本金。
諗完優點，又諗下有咩缺點：獲獎機會率很低、£50,000 上限限制了獲獎機會、沒有利息、獎金多少沒有保證、通脹會蠶食現金價值。
值唔值得博個機會呢？我哋又睇多啲數據。而家大概有 2,250 萬人持有 Premium Bonds，當中有近 2/3（64%）人從未中過獎，相當於超過 1,400 萬人。咁你明啦？！
咁 Premium Bonds 適合啲咩人呢？唔⋯⋯佢雖然無息，但免稅，對於擁有大量現金儲蓄嘅存戶嚟講，呢個可能會係一個擺錢嘅好地方；另外，對於熱衷於賭博嘅英國人嚟講（你睇下條街投注站多過便利店就知），呢個 Premium Bonds 更加係非常吸引啦。
呢樣嘢啱唔啱你自己，真係好見仁見智，就好似買六合彩咁，有人期期都買，有人睇心情買，有人要有人夾先買，不過買六合彩嘅錢俾咗就無得攞返，Premium Bonds 嘅錢係可以攞返。
資料來源：Forbes
實用連結：英國政府 NS&I 網站
400歲人瑞 —— 40幾歲中年漢被同事嘲笑是400歲人瑞，結果憤而出走鼓起勇氣探索英倫新世界（沒有啦！我和同事關係很好⋯⋯至少我自己是這樣認為）。在重新適應異地生活的過程中，尋找他鄉生活的技巧與生存的態度。從第一身視角分享人性的矛盾、制度的差異、文化的衝擊，真實揭露財富是如何一點一滴積累，以及真人倒錢落海的經驗⋯⋯
本欄〈太唔是何〉逢周五登場，旨在分享筆者在英國日常生活體驗，給各位多一個生活參考，相關分享不存在實用資訊（抱歉！），只反映在當時情況下，筆者遇到的真實情況紀錄，大家可以當係故仔聽，參考一下。
留言、給讚、追蹤、分享，請follow 《太唔是何》Threads或Facebook專頁
