寒冬下,如何用Bonus?
唔少打工仔在12月都獲發期待已久的Bonus,難得有額外錢到手,究竟用來買嘢抑或投資,而投資又應該揀乜好?
先講買嘢,理論上獎金到手,應較有條件可以入手需要又想要的產品,但你亦要預計一下明年經濟的「溫度」。暫時有兩大訊號預示明年經濟將會吹冷鋒,一是大企業調整人手,近期已有銀行及零售企業公布會裁員,二是加薪幅度,有調查指本地打工仔明年扣除通脹加薪幅度只有1.9%,跑輸亞洲其他大城市。
既然明年本地經濟寒氣迫人,似乎都係保留資本較化算。況且打工仔獎金到手後最熱門的購物目標電子產品,吸引力亦每下愈況。最強例子係手機,iPhone滯銷代表追款行為已經過氣,你把獎金入手一部攻頂iPhone,不單未必換來羨慕目光,甚至可能被同事揶揄。
而且電子產品滯銷,將迫使廠商在明年把頂尖技術曬冷,例如手機有摺屏,全片幅無反相機像素會再大提升,倒不如保留獎金待明年入手更具性價比的產品。
至於投資,近日Bitcoin大劈價,有分析建議打工仔用部分獎金放手一搏低吸Bitcoin。但要留意Bitcoin現時最大危機是業界動輒任性地分拆新Coin即時震散「幣值」,而且蚊型交易平台亦開始出現倒閉危機,最壞的情況是你未賺到錢,使用的交易平台就忽然消失。
倒不如選擇一些抗寒力較強的投資,經濟寒冬來襲往往對慳家生活概念股最有利,例如業績勝預期的大家樂,另外入場費夠平的即食麵股日清及茶啡股捷榮國際,零售股則可考慮Uniqlo母企迅銷。唔想諗咁多求穩陣,既可以考慮入手中華煤氣,又或用年齡達標的父母名義申請銀髮債,穩賺三厘息唔使煩。
最後都係嗰句,唔好當Bonus係一筆橫財,因為通常橫財都會亂使。Bonus係你人工嘅一部份,辛苦成年先賺到,點都應該謹慎啲。
===============
財經精選資訊網站「中環街市」 臉書粉絲頁