【形勢不妙】好快在家工作都要「通勤」

.

在家工作形勢越來越不妙，繼多間巨企領袖炮轟在家工作令創意、生產力減退，新趨勢係淡化在家工作甜頭，牽頭示範就係微軟。

微軟公布由明年起，旗下視像會議員工通訊軟件Team會讓用戶在朝早及晚上各來一節「虛擬通勤」。玩法唔係整段片叫用戶扮搭車，而係朝早先撥一節時段讓用戶回顧當日待辦事項及列出是日工作目標，晚上的一節會讓用戶整理當日完成項目，並列出待辦工作留待明天繼續處理。雖然比起古語有云「吾日三省吾身」已少了一次「反省」，但講得白啲，即係原來因為在家工作慳返的通勤時間，因為新加這兩節又變回工作時段。

據說原意是想在家工作都有個「終結」，例如5點半「通勤」後就正式自行收工，但事與願違，「5點半call會」後，到晚上又是否可以「真工收工」？

唔少大企業都會用到Team，日後新加這兩節時段，仍可以在家工作固然要登入系統現身參與，即使員工已回歸工作間，管理層都可能要求搭車時用手機完成這兩節事項，對想搭車補眠員工來講都算係惡夢。

.

即使唔打算用Team的中小企，假如老闆聽到連通勤都有得虛擬，就可能會順勢發揮創意。例如推行「早問卷、晚快閃會」政策，規定朝早員工搭車都要填問卷，交代工作進度及未完成事項，傍晚就日日來個快閃會，唔趕住走員工就入會議室，但趕住走都可以「貼心地」容許員工以視像方式搭車邊參與，讓各員工匯報今日工作情況及進度，少不免會有老闆積極捽數環節，所有會都無得再避，隨時肚痛入到廁格都可以參與。

.

面對經濟疲弱，即使老闆咁樣「加料」，員工都未必敢劈炮，頂多只好暗暗埋怨微軟做壞規矩。但微軟此舉，又可以令老闆及大企業管理層心目中加分，對微軟而言，企業客才是大茶飯，一般消費者市場只係零用錢收入吧。

假如在家工作優勢、甜頭不斷被削弱，跌到殘的收租及交通股就可能受惠，即使未必大升亦有望適度反彈甚至增加派息。想低吸疫後概念股又唔怕揸長一點的朋友，不妨留意一下這兩類股份。

===============

精選資訊網站「中環街市」 臉書粉絲頁