很想跟阿叻說,800蚊打波真係貴﹗
世界盃未開波,荷蘭叻已經落場,不過唔係踢波,而係打高爾夫,話800蚊打一場絕對唔貴。
唔講土地問題,如果阿叻夢想做tiger woods(打波方面),800蚊一兩Q,其實一啲都唔貴,但以一個平民只想體驗一下國際標準18洞球場來講,只能留在香港玩,800蚊就相當貴了。
睇返鄰近香港嘅球場,例如曼谷市郊Cascata高球俱樂部、台灣高雄信誼高爾夫球場,其實計落仲抵玩,布吉島Red Mountain就貴少少,大約1500蚊,但球洞有山又有水,話晒都係旅行,刺激程度一定比喺香港對住間村屋打Golf好玩。
筆者朋友通常都返內地打,有部分球場以年卡收費,4000球亦不過6000人仔,玩足一年。
現時中國約600個18洞高爾夫球場,雖然近年內地為保天然資源,開始汰弱留強,供應減少,但因為內地正在推動高爾夫,部分球場就算會籍貴,純打一場,對香港人來講,都可以有平民收費。
以中國高爾夫協會發佈《“十三五”高爾夫球運動發展規劃意見》公告為例,學生要打高爾夫的話,用練習場就更平,一般在40至60元人仔不等。當然呢個價錢香港人無得享用,但都反映咗,其實留喺香港對住村屋景800蚊打一場,唔算平啦﹗
再者,800蚊對中產來說,一定負擔得起,但話香港打波平,就真係講唔通。上年瑞士寶盛私人銀行(Julius Baer)發表財富報告,香港取代上海成為高端生活成本最昂貴的城市,其中酒店套房、高爾夫球會籍等項目均排亞洲第二。
一般中產,買新樓都係貪個會所,打得Golf當然想入會,但以營運粉嶺高球場的「香港高爾夫球會」會籍為例,二手都炒到上1700萬港元,試問可以點樣入會?
香港最識精打細算的,係一眾媽媽幫。其實只要開放會籍,好似買海洋公園年票咁,俾師奶平價入會,得閒帶小朋友打Golf,咁乜都唔使拆啦﹗
===============
財經精選資訊網站「中環街市」 臉書粉絲頁