怡和應否放棄美心

美心太子女威力終於獲怡和旗下牛奶國際確認，牛幼國際在第三季財報表示美心業務受時局衝擊，惹人思考擅長賣嘢的怡和會否狠心「放棄美心」。

理論上時局衝擊只係一時三刻，業務基本因素穩定就值得守一下。

以美心在香港品牌及分店網絡之強，應有條件守得雲開。可惜整個集團最大不明朗因素係太子女不時會發表政見，大台富豪家族角力劇都教識大家，要勸止大家族內德高望重又有性格的成員講少兩句可能較登陸月球背面更難，所以美心要甩走這項不明朗因素暫時都幾悲觀。

這個唔難明道理，精明如怡和應該都睇得通，連手握中環罕貴寫字樓組合的置地，怡和大班都曾明言無話唔賣得關鍵只係價錢，更何況只佔50%的美心「投資」。而且本地餐飲業，怡和另外經營的Pizza Hut及KFC亦搞得有聲有色，若然睇淡本地餐飲業前景，加注其他業務是合理決定，咁就有理由放棄美心了。

揸住大堆靚品牌的美心，怡和肯放聲氣賣，相信大把財團有興趣。喜歡以餐飲零售擴大支付業務的騰訊及阿里巴巴固然有可能出巨資一口氣買下伍氏及牛奶國際的持股，另一黑馬係近期聯同置地發展地產項目的新地。

一來合作搞得地產即係有計傾，二來新地已有接手九巴家族企業經驗，論股權複雜度，當年九巴可能更難搞，加上強大餐飲業務對新地收租王國有協同效應，過渡相對容易，八月花在Vcity只是易主，這個算盤應打得響。

當然積極開拓多元化業務的恆地及新世界都有機會加入爭奪戰，怡和透過美心大豐收，分分鐘可能快過等銅鑼灣怡東酒店重建完成吧。

===============

精選資訊網站「中環街市」 臉書粉絲頁