【意外保險】復工未復課 可以點添加保障?

·3 分鐘文章

踏入三月唔少父母都面對頭痛情況,自己要復工但子女又未復課,除了拜託工人姐姐睇緊啲,揀定小朋友意外保險,都可以為自己及子女添加保障。

揀意外保「醫」字先決

疫情下小朋友都盡量少外出,但由農曆年悶到依家,父母即使復工,都會容許子女每日有一段時間落街玩。另一常見情況係拜託工人姐姐先帶子女到同區親友家中安頓再去買餸及生活用品,這段路途不論係步行或搭車都有機會碰上意外,足以令復工父母擔驚受怕。

大家回顧童年時遇上的意外,離不開跌穿頭、傷手傷腳,這些損傷醫療手尾可能長達數月才完全康復,加起來都係一筆唔細的開支。所以兒童意外保險,焦點應該放在醫療之上。現時市面上既有標榜以兒童、學生為對象的意外保,亦有歲數涵蓋兒童及青年少的意外保險產品。不論係選擇前者或後者,都應該留意保障範疇是否包括門診、住院開支,最理想係包括跌打及針灸開支。但即使「全包」亦要看賠償額,有些保費較平的兒童意外保,全年醫療保額只有幾千元,可能住一次院已經爆額了。部分意外保更會提供跌打及物理治療中心轉介服務,對平日少接觸這兩類醫療服務的父母,這類轉介服務亦有一定吸引力。

搭車保勝在平

復工後大家又要重拾迫巴士、地鐵日子,對沖疫情風險,除了要購買增加抗疫保障的醫保產品,你亦可能要諗多一步加購搭車通勤保險。原因係路面風險有增無減,皆因疫情爆發後越來越多人買車代步,甚至連平日都會揸車返工以減少迫車中招風險。而這批車主不乏新牌仔又或車牌急凍多年司機,試想像一下之前大家home office,平日繁忙時間路面汽車流量大減,現在復工車輛數猛增,再加上這批新手,路面風險確實會升溫。

為了這個隱憂又買多份保險似乎唔太划算?其實市場上兩款搭車保賣點係平,保費除開每日最多只要$1,即可以享有交通意外身故、傷殘及醫療保障。其中一款更涵蓋網約車、貨Van甚至飛機及渡輪,所費有限就可以買個安心。

網絡欺凌都有得保

停學期間有小學生化名「雞丁」自製MV一炮而紅,或許會激勵更多小朋友發揮創意進軍網紅界。父母對此可能會既憧憬子女可以成名,又怕子女受不了網民惡毒批評,甚至惹來黑客入侵帳戶就更麻煩。

針對網絡欺凌問題,原來市場上都有保險提供保障。這款保險提供技術及法律支援,你亦可以透過24小時熱線即時向技術專家求救。小朋友遇上網絡欺凌亦需要情緒支援,因此保險亦提供註冊精神科及心理學醫生創傷輔導支援,而且保費每日只需$1。順帶一提這款保險提供個人計劃及家庭計劃選擇,所以都適合有意成為網上KOL的大人作為網上事業後盾。

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能